| 4314. | வில்லும், வாளும், அணிதொறும் மின்னிட,
மெல் அரிக் குரல் மேகலை ஆர்த்து எழ,
பல் வகைப் புருவக் கொடி பம்பிட,
வல்லி ஆயம் வலத்தினில் வந்ததே. |
அணிதொறும் - அணிந்துள்ள அணிகலன்கள் தோறும்; வில்லும்
வாளும் மின்னிட - வில்லும் வாளும் ஒளிவிடவும்; மெல் அரிக் குரல் -
மெல்லிய பரல்களையுடைய காற்சிலம்புகளின் ஒலியும்; மேகலை ஆர்த்து எழ
- இடையணியான மேகலை (பறையொலிபோல) ஆரவாரித்து எழவும்;
பல்வகைப் புருவக் கொடி - பலவகைப்பட்ட புருவங்களாகிய கொடிகள்;
பம்பிட - நிறைந்திருக்கவும்; வல்லி ஆயம் - மகளிர் கூட்டமாகிய சேனை;
வலத்தினில் வந்தது - வலிமையோடு (இலக்குவனை) வளைத்துக் கொண்டது. மகளிர் கூட்டம் இலக்குவனைச் சூழ்ந்து வழிமறித்ததை, ஒரு சேனை
வந்து சூழ்ந்ததாக வருணித்தார். மகளிர் இடம் பெயர்ந்து செல்லும்போது
அவர்களின் சிலம்பும் மேகலையுமாகிய அணிகள் ஒலிப்பதைப் போர்ப்
பறைகளின் ஒலியாக உவமித்தார். அரி: சிலம்பின் உட்பரல். புருவக் கொடி -
கொடி போன்ற புருவம். கொடி - புருவக்கொடியையும், போர்க் கொடியையும்
குறித்தது. கொடி: படர்கொடியும் துவசமும். சிலேடையை அங்கமாகக்
கொண்ட உருவக அணி. மெல்லரி - பண்புத் தொகையன்மொழி (சிலம்பு)
வல்லி - (பெண்) உவமையாகுபெயர். 46 |