அமிழ்தம் மாறு இலாமொழி - தேவ அமிழ்தமும் இணையாகாத
(இனிய) சொற்களையுடைய; உருமையைப் பயந்தவன் - சுக்கிரீவன்
மனைவியான உருமையைப் பெற்ற தந்தை; ஈறு இல் வேலையை - முடிவு
காணப்படாத கடலையும்; இமைப்புறம் அளவினில் - கண் இமைக்கும்
நேரத்தில்; கலக்கிச் சேறு காண்குறும் - கலக்கிச் சேறாக்க வல்ல; திறல்
கெழு - வலிமை நிறைந்த; வானர சேனை ஆறு எண் ஆயிர கோடியது -
நாற்பத்தெட்டாயிரங் கோடி வானர சேனை; உடன் வர - தன்னைத்
தொடர்ந்து வர; வந்தான் - வந்து சேர்ந்தான்.

     உருமையின் தந்தை தாரன் என்பவன்; இவன் தேவகுருவாகிய
பிரகஸ்பதியின் மைந்தன்.  இத் தாரன் கடலையும் கலக்கிச் சேறாக்க வல்ல
நாற்பத்தெட்டாயிரங் கோடி வானர சேனையோடு வந்தான் என்பது.

     கோடியது: (கோடி + அது) - அது பகுதிப் பொருள் விகுதி.         4