ஏகி - (நீ இங்கிருந்து) சென்று; ஏந்திழை இருந்துழி தன்னை -
அணிகளையுடையவளாகிய சீதை இருக்கும் இடத்தை; நாகம் நாடுக -
நாகர்கள் உறையும் பாதலத்தில் சென்று தேடுவாய்; நானிலம் நாடுக -
பூமியிலும் தேடுவாய்; போக பூமி புகுந்திட வல்ல நின் வேகம் - போக
பூமியான சொர்க்கலோகத்திற்கும் செல்ல வல்லமையுள்ள உனது வேகமும்;
ஈண்டு வெளிப்பட வேண்டும் - இப்போது வெளியாக வேண்டும்.

     'நீ மூவுலகங்களிலும் சென்று சீதையைத் தேட வேண்டு'மென்று
சுக்கிரீவன் அனுமனுக்குக் கூறினான் என்பது.  ஏந்திழை: அன்மொழித்
தொகை.  இருந்துழி: தொகுத்தல் விகாரம்.  போகபூமி: உயிர்கள் புண்ணிய
மிகுதியால் சென்று போகங்களைத் துய்க்கும் சுவர்க்கம்.             6