அங்கதக் குரிசிலோடு - அங்கதனாகிய நம்பியினுடனே; அடு சினத்து
உழவர் ஆம் - (பகைவரைக்) கொல்லுகின்ற கோபத்தையுடைய வீரரான;
வெங் கதத் தலைவரும் - மிக்க வலிமையுள்ள (ஜாம்பவான் முதலான)
தளபதிகளும்; செங்கதிர்ச் செல்வனை - சிவந்த கதிர்களை யுடைய சூரியன்
மகனான சுக்கிரீவனை; பணிவரும் சென்னியார் - வணங்கும் தலையினராய்;
பொங்கு வில் தலைவரைத் தொழுது - சிறந்த வில்வீரர்களான
இராமஇலக்குவரையும் வணங்கி; விரிகடற் படையொடும் - பரந்த
கடல்போன்ற வானர சேனையுடனே; முன் போயினார் - (தென்திசை நோக்கி)
முற்பட்டுச் சென்றார்கள்.

     அங்கதன் முதலியோர் சுக்கிரீவனையும், இராம இலக்குவரையும்
வணங்கித் தமக்கு நியமித்துள்ள தென்திசை நோக்கிப் புறப்பட்டார்களென்பது.
உழவர்: வீரர்: பகைவரின் உடம்பாகிய வயல்களில் தம் படைகளாகிய
கலப்பைகளைக் கொண்டு உழுது வெற்றியாகிய பயிரை விளைப்பவராதலால்
இது வீரரைக் குறிக்கும். - வில்லேருழவர் வாளேருழவர், சொல்லேருழவர்
என்றாற்போல.                                                 74