4607. அணி கொழித்து வந்து, எவரும் ஆடுவார்
பிணி கொழித்து, வெம் பிறவி வேரின் வன்
துணி கொழித்து, அருஞ் சுழிகள்தோறும், நல்
மணி கொழிப்பதன் துறையின் வைகினார்.

     அணி கொழித்து வந்து - அழகாக அலை வீசிக் கொண்டு வந்தும்;
ஆடுவார் எவரும் -
(தன்னிடம்) மூழ்கினார் எவராயினும்; பிணி கொழித்து
-
நோய்கள் நிறைந்த; வெம் பிறவி வேரின் வன்துணி கொழித்து - கொடிய
பிறப்புக்களினுடைய வேர்கள் (வினை) வலிய துண்டுகளையடித்துக் கொண்டும்;
அருஞ் சுழிகள் தோறும் -
(தப்புவதற்கு அரிய) தன் நீர்ச் சுழிகளிலெல்லாம்;
நல் மணி கொழிப்பதன் -
சிறந்த இரத்தினங்களை வாரிக் கொண்டும்
வருகின்ற பெண்ணை நதியின்; துறையின் வைகினார் - ஒரு துறையில்
(வானர வீரர்) தங்கியிருந்தார்கள்.

     தன்னில் மூழ்கியவர் எந்த அளவு பாவியராயிருப்பினும் அவர்களது
பிறவிக்குக் காரணமான பாவங்களையெல்லாம் போக்கி, அவர்களுக்கு
முத்தியளிக்க வல்ல பெருமையுள்ளதும், நீர்ச் சுழிகளில் இரத்தினங்களை
வாரிக்கொண்டு வரும் வளமுள்ளதுமான பெண்ணை நதியின் தென்கரையை
அடைந்து வானர வீரர்கள் தங்கினார்கள் என்பது.  பிறவிவேர் - பிறப்புக்குக்
காரணமான வினைகள் 'கொழித்தல்' என்னும் வினைச் சொல் வெவ்வேறு
பொருளில் பலமுறை வந்தது:சொற்பின்வருநிலையணி.               14