கோதாவரியை அடைதல்

4620.

ஊதைபோல் விசையின், வெங் கண்       உழுவை போல் வயவர், ஓங்கல் ஆதியை அகன்று செல்வார்;       அரக்கனால் வஞ்சிப்புண்ட சீதை  போகின்றாள் கூந்தல் வழீஇ       வந்து, புவனம் சேர்ந்த கோதைபோல் கிடந்த கோதாவரியினைக்       குறுகிக் சென்றார்.

     ஊதைபோல் விசையின் - காற்றைப் போல வேகத்தைக் கொண்ட;
வெங் கண் - (சினத்தால்) கொடுமையான பார்வையுடைய; உழுவைபோல்
வயவர் - புலிபோன்ற வலிமையுள்ள அந்த வானர வீரர்; ஓங்கல் ஆதியை -
அந்தப் பாண்டு மலையின் அடிவாரத்தை; அகன்று செல்வார் - நீங்கி
அப்பாலே செல்பவர்களாகி; அரக்கனால் வஞ்சிப்பு உண்ட - இராவணனால்
வஞ்சித்துக் கவரப்பட்டு; சீதை போகின்றாள் - செல்லுகின்ற சீதையினது;
கூந்தல் வழீஇ வந்து - கூந்தலிலிருந்து நழுவி வந்து; புவனம் சேர்ந்த -
பூமியையடைந்த; கோதை போல் கிடந்த - மலர்மாலை போல விளங்கிய;
கோதாவரியினை -  கோதாவரி என்னும் ஆற்றை; குறுகிச் சென்றார் -
நெருங்கிச் சேர்ந்தார்கள்.

     உயரமான இடத்திலேறிக் காண்பவர்க்கு ஆறுகள் வெண்மையான மலர்
மாலைபோலத் தோன்றுமாதலால் கோதாவரி நதியை இராவணன் சீதையைக்
கவர்ந்து செல்லும்போது அவளது கூந்தலிலிருந்து நழுவிக் கீழே விழுந்த மலர்
மாலை போலுமென்று வருணித்தார்.  ஊதை: சீறி வீசுவதால் வேகத்திற்கு
உவமை. வழீஇ: சொல்லிசையளபெடை.                            27