4754.

'குறுமுனிகுடித்த வேலை
     குப்புறும்கொள்கைத்து ஆதல்
வெறுவிது;விசயம் வைகும்
   விலங்கல்-தோள் அலங்கல் வீர !
'சிறிதுஇது' என்றுஇகழற்பாலை
     அல்லை; நீசேறி' என்னா;
உறுவலித் துணைவர்சொன்னார்;
   ஒருப்பட்டான்; பொருப்பை ஒப்பான்.
 

     உறுவலித் துணைவர்- மிக்கவலிமையையுடைய நண்பர்கள்
(அனுமனை நோக்கி); விசயம் வைகும் - வெற்றி குடிகொண்ட;
விலங்கல்தோள் அலங்கல்வீர -
மலைபோன்ற தோளில் மாலையணிந்த
வீரனே !; குறுமுனி குடித்த வேலை - அகத்திய முனிவனால் பருகப்பட்ட
இந்தக் கடல்; குப்புறும் கொள்கைத்தாதல் - பாய்ந்து கடக்க வேண்டிய
கோட்பாட்டுக்கு உரிய பொருளாயிருத்தல்; வெறுவிது - மதிக்கத் தகாதது
(பயனற்றது); இது சிறிது - இந்தக் கடல் (என் வலிமைக்கு) அற்பம்; என்று
இகழற்பாலையல்லை -
என்று இக் கடலை அவமதிக்கும் பான்மையை
அடையாதே; நீ சேறி - நீ செல்வாயாக; என்னா - என்று; சொன்னார் -
கூறினார்கள் (அம்மொழி கேட்டு); பொருப்பை ஒப்பான் - மலையை ஒத்த
அனுமான்; ஒருப்பட்டான் - (அவர்கள் சொற்களுக்கு) உடன் பட்டான்.

     'பேருருக் கொண்டஎன் ஆற்றலுக்குக் குறுமுனி குடித்த கடல் அற்பம்'
என்று நீ கருதாது செல்க என்று துணைவர்கள் கூறினார்கள். அவர்கள்
மொழிகட்கு அனுமன் உடன் பட்டான். குறுமுனி - அகத்தியர். குப்புறுதல் -
பாய்ந்து கடத்தல்.                                           
(14)