அற்புதன் -அதிசயப்பண்புற்ற இராமபிரான்; அரக்கர் தம் வருக்கம்
- அரக்கர்களின் குலம்; ஆசு அற - பற்றுக்கோடு இல்லாமல்; வில் பணி
கொண்டு - வில்லை ஏவல் கொண்டு; அருஞ்சிறையின் - கொடிய
சிறையிலிருந்து; மீட்ட நாள் - மீட்கும் காலத்தில்; இல்புகத் தக்கலை
அல்லை - என் வீட்டில் நுழையத் தகுதியுடையை அல்லை என்று; என்னில்
- என்று கூறினால்; யானுடைக் கற்பினை - யான் கொண்டுள்ள கற்பை;
எப்பரிசு - எந்த வகையால்; இழைத்துக் காட்டுகேன் - நிரூபித்துக்
காண்பிப்பேன்.

     ஆசு - பற்றுக்கோடு. குற்றம் என்றும் கூறலாம். பணி கொண்டு - ஏவல்
கொண்டால். 'பாவியேனைப் பணி கொண்டாய்' என்பர் மணிவாசகர்.
"வானவரைப் பணிகொண்ட மருகாவோ" என்பாள் (கம்ப. 2842.) சூர்ப்பணகை
- இராமன் வில்லின் பணி கொண்டான் இழைத்தல் - நிரூபித்தல்,
பரிசு - தன்மை, மீட்ட நாள் - கால மயக்கு, எதிர்காலம் இறந்தகாலமாகப்
பேசப்பட்டது. தக்கலை - முன்னிலை ஒருமை எதிர்மறை வினைமுற்று.  (20)