சீதை மாதவிப்பொதும்பர் அடைதல்.
அனுமன் தோன்றுதல்

(பிராட்டி)

     ஆதலான் -ஆகையினாலே; இறத்தலே - யான் இறப்பது தான்;
அறத்தின் ஆறு - அறத்தினால் காட்டப் பெற்ற வழியாகும்; எனா - என்று
உறுதிப்படுத்திக் கொண்டு; சாதல் காப்பவரும் - யான் இறப்பதைத்
தடுப்பவரும்; என் தவத்தின் - என்னுடைய தவத்தினாலே; சாம்பினார் -
மயங்கியுள்ளனர்; ஈது அலாது - இந்தச் சமயம் தவிர; வேறு இடமும்
இல்லை - வேறு சந்தர்ப்பம் இல்லை; என்று - என்று தனக்குள்
கூறிக்கொண்டு; உலாம் - சூழ்ந்துள்ள; போது - மலர்களைப் பெற்ற; ஒரு
மாதவிப் பொதும்பர் - ஒரு குருக்கத்திச் சோலையை; எய்தினாள் -
அடைந்தாள்.

     'ஆதலால்' என்னும் முடிபுநிலைச்சொல் மேலே போந்த (11-20) பத்துப்
பாடலை நோக்க நின்றது. அப்பாடல்களில் இறப்பது நன்று' என்னும்
முடிவுக்குக் காரணங்கள் நினைக்கப்பெற்றன. போது உலாம் - மலர் சூழ்ந்த.
'தூசு உலாய்க் கிடந்த அல்குல்' (சிந்தாமணி 550) அங்கு இனியர் உலாய் -
சூழ்ந்து என்று குறித்தார்.                                     (21)