அனுமன்திருவாழியைக் காட்டலும்
பிராட்டியின்நிலையும்

     மீட்டும் உரைவேண்டுவன இல்லை என - திரும்பவும் யான் கூற
வேண்டியவை இல்லை என்று; மெய்ப்பேர் தீட்டியது - உண்மைப் பேர்
பொறிக்கப்பட்டதும்; தீட்டரிய செய்கையது - எழுத முடியாத வேலைப்பாடு
பெற்றதும்; (ஆன) இது - இந்தத் திருவாழி; செவ்வே நீட்டு என -
செவ்வையாய் அமைந்த திருமுகம் என்று கூறி; (இராமபிரான்) நேர்ந்தனன் -
என்பால் வழங்கினான்; எனா - என்று கூறி (அனுமன்); நெடிய கையால் -
நீண்ட கைகளில்; ஓர் ஆழி - ஒப்பற்ற மோதிரத்தை; காட்டினன் -
காண்பித்தான்;  அது - அந்த மோதிரத்தை; வாள் நுதலி - ஒளிமிக்க
நெற்றியை உடைய பிராட்டி; கண்டாள் - பார்த்தாள்.

     நீட்டு -திருமுகம் (கடிதம்) சித்திர சேனன் நீட்டு அவிழா (உபதேச
காண்டம்; சிவத்துரோகம் 174) அமரர் கம்பனடிப்பொடி, 'நீட்டு' என்பதற்குக்
குறிப்பு மொழி அடங்கிய ஓலை என்று பொருள் கூறிக் கல்வெட்டை ஆதாரம்
காட்டுவர். அவர், நீட்டோலை வாசியா நின்றான்... மரம்' என்னும் பாடலை
மேற் கோள் நினைவு கூர்வர்.                               (63)