வண்டு அலம்பு நல்ஆற்றின் மராமரம் - வண்டுகள்
ஒலிக்கும்படியான, அழகிய சாலையிலிருந்த ஆச்சா மரங்கள்; வண்டல்
அம்புனல் ஆற்றின் மடிந்தன - வண்டலைக் கொண்ட அழகிய நீர் நிறைந்த
ஆற்றில் போய் விழுந்து அழுந்தின; விண் தலம் புக நீள் மரம் - வான்
அளவு உயர்ந்து வளர்ந்த வேறு சில மரங்கள்; விண்டு அலம்பு கம் நீங்கிய
வெண்புனல் வீழ்ந்த - திருமாலின் திருவடிகளைப் பிரம தேவன்
கழுவியதனால் தோன்றி வானத்தினின்றும் பூமியை நோக்கி இறங்கி வந்த
வெள்ளிய நீரை உடைய ஆகாச கங்கையாற்றிலே வீழ்ந்தன.

     விண்டு - விஷ்ணு;(திருமால்) கம் - ஆகாயம்; இதுவும் யமக அணி.
வெண் புனல் - கங்கை; அதனால், 'ஆறு' என்பது காவிரியைக் குறிக்கிறது
என்பாரும் உளர். இதுமுதல் (5460 - 5463) முடிய முன் இரண்டடிகளின்
முதல் இரு சீர்கள் ஒருவகையாகவும் பின் இரண்டடிகளின் முதல் இரு சீர்கள்
வேறுவகையாகவும் மடக்கி வந்து, யமக அணி பொருந்தப் பெற்றிருப்பது
காண்க.                                                   (32)