| 5536. | கரதலத்தினும் காலினும் வாலினும் கதுவ,
நிரை மணித் தலைநெரிந்து உக, சாய்ந்து உயிர்
நீப்பார்,
சுரர் நடுக்குற அமுது கொண்டு எழுந்த நாள்,
தொடரும்
உரகர் ஒத்தனர்- அனுமனும் கலுழனே ஒத்தான். |
கரதலத்தினும்,காலினும் வாலினும் கதுவ - அனுமன் தனது
கைகளாலும், கால்களாலும், வாலினாலும் பற்றுதலினால்; நிரைமணித்தலை
நெரிந்து உக சாய்ந்து உயிர் நீப்பார் - வரிசையாகக் கரிய நிறமுள்ள தமது
தலைகள் நசுங்கிச் சிதறுதலினால் மண்மீது விழுந்து உயிர்விடுகின்ற
கிங்கரர்கள்; சுரர் நடுக்குற அமுது கொண்டு எழுந்த நாள் - தேவர்கள்
அஞ்சும்படி, அமுத கலசத்தை எடுத்துக் கொண்டு மேலே கிளம்பும் பொழுது;
தொடரும் உரகர் ஒத்தனர் - (காவலிருந்து கவர வொட்டாது தடுக்கத்)
தொடர்ந்த பாம்புகளை ஒத்தனர்; அனுமனும் கலுழனே ஒத்தான் -
அனுமனும், (அமுதத்தோடு எழுந்த) கருடனை ஒத்திருந்தான். (48) |