முகப்பு தொடக்கம்
நற்காட்சி
 
2812.
  • கொங்கு விம்மு குளிர் பிண்டிக் குழவி ஞாயிற்று எழில் ஏய்ப்பச்
  • சிங்கம் சுமந்த மணி அணை மேல் தேவர் ஏத்திச் சிறப்பு அயர
  • எங்கும் உலகம் இருள் நீங்க இருந்த எந்தை பெருமானார்
  • தங்கு செந்தாமரை அடி என் தலையவே என் தலையவே
   
2813.
  • இலங்கு செம் பொன் எயில் மூன்றும்
  • எரி பொன் முத்தக் குடை மூன்றும்
  • வலம் கொண்டு அலர் தூஉய் அடி ஏத்தும்
  • வையம் மூன்றும் படை மூன்றும்
  • கலங்காது உயர்ந்த அதிசயங்கள்
  • மூன்றும் காமர் நூல் மூன்றும்
  • நலம் கொள் தீம் பால் குணக் கடலும்
  • உடையார் நம்மை உடையாரே
   
2814.
  • மன்றல் நாறும் அணி முடி மேல்
  • மலிந்த சூளா மணி போலும்
  • வென்றோர் பெருமான் அறவாழி
  • வேந்தன் விரி பூந் தாமரை மேல்
  • சென்ற திருவார் அடி ஏத்தித்
  • தெளியும் பொருள்கள் ஓர் ஐந்தும்
  • அன்றி ஆறும் ஒன்பானும்
  • ஆகும் என்பார் அறவோரே
   
2815.
  • பெரிய இன்பத்து இந்திரனும்
  • பெட்ட செய்கைச் சிறு குரங்கும்
  • உரிய செய்கை வினைப் பயத்தை
  • உண்ணும் எனவே உணர்ந்து அவனை
  • அரியர் என்ன மகிழாதும்
  • எளியர் என்ன இகழாதும்
  • இரு சார் வினையும் தெளிந்தாரே
  • இறைவன் நூலும் தெளிந்தாரே
   
2816.
  • உறுவர்ப் பேணல் உவர்ப்பு இன்மை
  • உலையா இன்பம் தலை நிற்றல்
  • அறிவர் சிறப்பிற்கு எதிர் விரும்பல்
  • அழிந்தோர் நிறுத்தல் அறம் பகர்தல்
  • சிறியார் இனத்துச் சேர்வு இன்மை
  • சினம் கைவிடுதல் செருக்கு அவித்தல்
  • இறைவன் அறத்து உளார்க்கு
  • எல்லாம் இனியர் ஆதல் இது தெளிவே
   
2817.
  • செறியச் சொன்ன பொருள் தெளிந்தார்
  • சேரார் விலங்கில் பெண் ஆகார்
  • குறுகார் நரகம் ஓர் ஏழும் கீழ்
  • முத்தேவர் குழாம் தீண்டார்
  • அறியாது உரைத்தேன் அது நிற்க
  • ஆறே நரகம் ஆகாத
  • பொறியார் போக பூமியுள்
  • விலங்கும் ஆவர் ஒரு சாரார்