(உரை)
கைகோள்: கற்பு. தலைவிகூற்று

துறை: பொழுதுகண்டு மயங்கல்.

     (இ-ம்.) இதனை, “அவனறிவாற்ற வறியுமாகலின்” (தொல். கற்பி,6) எனவரும் நூற்பாவின்கண் ‘இன்பமும் இடும்பையுமாகிய விடத்தும்’ என்புழி “இடும்பை ஆகியவிடத்தும்” என்னும் விதிகொள்க. இனி அகத்திணையியலின்கண் “எஞ்சி யோர்க்கு மெஞ்சுதல் இலவே” (தொல்-42) எனவரும் நூற்பாவினால் அமைப்பினுமாம்.

1-2: கோடிய................................புக

     (இ-ள்) கோடிய கோலினன் செருமுகம் போல-வளைந்த கோலையுடைய அரசன் போர்க்களத்தே தோற்றுவீழுமாறு போலே; கனைகதிர்-நெருங்கிய கதிர்களையுடைய ஞாயிற்று மண்டிலம்; திருகிக்கல்சேர்ந்து முறைபுக-மாறுபட்டு மறைமலையினைஎய்தி முறையே கடலின்கண் வீழாநிற்பவும் என்க.

     (வி-ம்.) கோடியகோல்-கொடுங்கோல். கொடுங்கோல் மன்னன் பகைப்புறத்தே தோற்றுவீழல் ஒருதலையாகலின் ஒளி மழுங்கிக் கடலில் விழும் ஞாயிற்றுக்கு உவமை எடுத்தார். செரு முகம்-போர்க்களம். போர்க்களத்தில் வீழுமாறுபோலே என்க. கனைகதிர்: அன்மொழித்தொகை. திருகுதல்-மாறுபடுதல். கல்-மலை என்றது கதிரவன் மறையும் மலையினை.

3-4: பதினெண்...............................கொள்ள

     (இ-ள்) புள்குளம்-பறவைக்கூட்டங்கள்; பதினெண் கிளவி ஊர்துஞ்சிய போல்-பதினெட்டுவகை மொழிகளும் பேசப்படும் பேரூரின்கண்ணே அம்மொழிகள் அவிந்து மாந்தர் உறங்கினாற்போல; பொய்கைவாய் தாழ்க்கொள்ள-தாழ்வாழும் நீர்நிலையிடத்தே ஆரவாரமடங்கித் தங்குதலைச் செய்யா நிற்பவும் என்க.