(பொ - ரை) திருச்சபைக்குச் சிரசு தேவகுமாரன்.
இவ்வுலகத்திலுள்ள திருத்தொண்டரெல்லாம் அதற்கு உடல். அப்படியாக
பரிசுத்த ஐக்கியம் நிலைபெற்று நின்று தருமத்தை வளர்க்கும்.

 

வேறு சத்தி யந்தரு மம்பொறை தயவுகண் ணோட்டம் சித்த சுத்திமெய்ப் பத்தியென் றித்தகு சீல வித்த கந்திகழ் சாதுக்க ளுளரெனும் விரகால் இத்த ராதல முளதில ரெனிலில தாமால்.  5

     (பொ - ரை) சத்தியம், தருமம், பொறுமை, தயவு, தாட்சணியம்,
சித்தசுத்தி, மெய்ப்பக்தி என்று இப்படிப்பட்ட தகுதியான ஒழுக்கத்துக்குரிய
ஞானந்திகழுகின்ற சாதுக்கள் இருக்கின்றார்கள் என்னும் சூழ்ச்சியால்
இவ்வுலகமானது இருக்கின்றது. அவர்களில்லையேல் உலகமும் இராது.

 

பண்டு நோவையுங் குடும்பமுங் கலம்புகப் பரவை மண்ட லத்தைவாய் மடுத்ததே மயலறு சான்றாக் கண்டு கேட்டறிந் தின்னமு முய்வழி கருதித் தொண்டு பட்டிடா ருலகரி தென்கொலோ துணிவே.  6

     (பொ - ரை) பூர்வகாலத்தில் நோவாவும் அவன் குடும்பத்தாரும்
பேழையில் புகுந்துகொள்ள, சமுத்திரமானது இப்பூமண்டலத்தைத் தன்
வாயில் போட்டுக்கொண்டதே சாட்சியாகக் கண்டும் கேட்டும் அறிந்தும்
இன்னமும் தாங்கள் உய்யவேண்டிய வழியை நினைத்து உலகத்தார்
ஈஸ்வரனுக்குத் தொண்டு செய்கின்றார்களில்லை. இவர்களுடைய துணிவு
இருந்தவாறென்னை!

 

இனைய தன்மைய சாதுசங் கத்தருக் கென்றும் முனைவ னீந்தருள் சுருதியே முத்திசா தனமாம் அனைய நூல்வழிப் படர்தலே யான்மர க்ஷணிய நினைவு கொண்டுடன் சிந்தையாத் திசைசெயு நீர்மை.  7

     (பொ - ரை) இப்படிப்பட்ட தன்மையையுடைய சாது
சங்கத்தவருக்குக் கடவுள் கொடுத்தருளிய சுருதியே எப்போதும்
முத்திசாதனமாம். அப்படிப்பட்ட நூல் முறைமையில் செல்லுதலே
ஆத்தும இரக்ஷணிய நினைவுகொண்டு உடனே மானத யாத்திரைசெய்யும்
தன்மையாம்.

 

ஆய வித்தகு சிந்தையாத் திரைபெரி தாற்றி நாயகன் கிறிஸ் தியேசுவுக் கன்புசெய் நண்பன் தூய ஜீவிய நடைகடைப் பிடித்தவோர் சுகிர்தன் மாயி ரும்புவி மயக்கறு மாண்புடை ஞானி.  8