தொடக்கம்
2.2 திருவலஞ்சுழி - வினாஉரை - இந்தளம்
	1480. விண்டு எலாம் மலர விரை நாறு தண் தேன் விம்மி, வண்டுஎலாம் நசையால் இசை பாடும் வலஞ்சுழி, தொண்டுஎலாம் பரவும் சுடர் போல் ஒளியீர்! சொலீர் பண்டுஎலாம் பலி தேர்ந்து ஒலிபாடல் பயின்றதே? 1	உரை
	1481. பாரல் வெண்குருகும் பகுவாயன நாரையும் வாரல் வெண்திரைவாய் இரை தேரும் வலஞ்சுழி, மூரல் வெண்முறுவல் நகு மொய் ஒளியீர்! சொலீர் ஊரல் வெண்தலை கொண்டு உலகு ஒக்க உழன்றதே? 2	உரை
	1482. கிண்ண வண்ணம் மல்கும் கிளர் தாமரைத் தாது அளாய் வண்ண நுண்மணல்மேல் அனம் வைகும் வலஞ்சுழி, சுண்ணவெண்பொடிக்கொண்டு மெய் பூச வலீர்! சொலீர் விண்ணவர் தொழ, வெண்தலையில் பலி கொண்டதே? 3	உரை
	1483. கோடுஎலாம் நிறையக் குவளை மலரும் குழி மாடுஎலாம் மலிநீர் மணம் நாறும் வலஞ்சுழி, சேடுஎலாம் உடையீர்! சிறுமான்மறியீர்! சொலீர் நாடுஎலாம் அறியத் தலையில் நறவு ஏற்றதே? 4	உரை
	1484. கொல்லை வேனல் புனத்தின் குரு மா மணி கொண்டு                                                    போய், வல்லை நுண்மணல்மேல் அன்னம் வைகும் வலஞ்சுழி, முல்லைவெண்முறுவல் நகையாள் ஒளியீர்! சொலீர் சில்லை வெண்தலையில் பலி கொண்டு உழல் செல்வமே? 5	உரை
	1485. பூசம் நீர் பொழியும் புனல்பொன்னியில் பல்மலர் வாசம் நீர் குடைவார் இடர் தீர்க்கும் வலஞ்சுழி, தேசம் நீர்; திரு நீர்; சிறுமான்மறியீர்! சொலீர் ஏச, வெண்தலையில் பலி கொள்வது இலாமையே? 6	உரை
	1486. கந்தமாமலர்ச் சந்தொடு கார் அகிலும் தழீஇ, வந்த நீர் குடைவார் இடர் தீர்க்கும் வலஞ்சுழி, அந்தம் நீர், முதல் நீர், நடு ஆம் அடிகேள்! சொலீர் பந்தம் நீர் கருதாது, உலகில் பலி கொள்வதே? 7	உரை
	1487. தேன் உற்ற நறுமாமலர்ச் சோலையில் வண்டுஇனம் வான் உற்ற நசையால் இசை பாடும் வலஞ்சுழி, கான் உற்ற களிற்றின் உரி போர்க்க வல்லீர்! சொலீர் ஊன் உற்ற தலை கொண்டு, உலகு ஒக்க உழன்றதே? 8	உரை
	1488. தீர்த்தநீர் வந்து இழி புனல் பொன்னியில் பல்மலர் வார்த்த நீர் குடைவார் இடர் தீர்க்கும் வலஞ்சுழி, ஆர்த்து வந்த அரக்கனை அன்று அடர்த்தீர்! சொலீர் சீர்த்த வெண்தலையில் பலி கொள்வதும் சீர்மையே? 9	உரை
	1489. உரம் மனும் சடையீர்! விடையீர்! உமது இன் அருள வரம் மனும் பெறல் ஆவதும்; எந்தை! வலஞ்சுழிப் பிரமனும் திருமாலும் அளப்பரியீர்! சொலீர் சிரம் எனும் கலனில் பலி வேண்டிய செல்வமே? 10	உரை
	1490. வீடும் ஞானமும் வேண்டுதிரேல், விரதங்களால் வாடின் ஞானம் என் ஆவதும்? எந்தை வலஞ்சுழி நாடி, ஞானசம்பந்தன செந்தமிழ்கொண்டு இசை பாடு ஞானம் வல்லார், அடி சேர்வது ஞானமே. 11	உரை