தொடக்கம்
2.3 திருத் தெளிச்சேரி - வினாஉரை - இந்தளம்
	1491. பூ அலர்ந்தன கொண்டு முப்போதும் உம் பொன்கழல் தேவர் வந்து வணங்கும் மிகு தெளிச்சேரியீர்! மே வரும் தொழிலாளொடு கேழல்பின் வேடன் ஆம் பாவகம்கொடு நின்றதுபோலும், நும் பான்மையே? 1	உரை
	1492. விளைக்கும் பத்திக்கு விண்ணவர் மண்ணவர் ஏத்தவே, திளைக்கும் தீர்த்தம் அறாத திகழ் தெளிச்சேரியீர்! வளைக்கும் திண் சிலைமேல் ஐந்துபாணமும் தான் எய் களிக்கும் காமனை எங்ஙனம் நீர் கண்ணின் காய்ந்ததே? 2	உரை
	1493. வம்பு அடுத்த மலர்ப்பொழில் சூழ, மதி தவழ் செம்பு அடுத்த செழும் புரிசைத் தெளிச்சேரியீர்! கொம்பு அடுத்தது ஒர் கோல விடைமிசை, கூர்மையோ அம்பு அடுத்த கண்ணாளொடு மேவல் அழகிதே? 3	உரை
	1494. கார் உலாம் கடல் இப்பிகள் முத்தம் கரைப் பெயும் தேர் உலாம் நெடுவீதிஅது ஆர் தெளிச்சேரியீர்! ஏர் உலாம் பலிக்கு ஏகிட, வைப்புஇடம் இன்றியே வார் உலாம் முலையாளை ஒர்பாகத்து வைத்ததே? 4	உரை
	1495. பக்கம் நும்தமைப் பார்ப்பதி ஏத்தி முன் பாவிக்கும் செக்கர் மா மதி சேர் மதில் சூழ் தெளிச்சேரியீர்! மைக் கொள் கண்ணியர் கைவளை மால் செய்து                                         வௌவவே, நக்கராய் உலகு எங்கும் பலிக்கு நடப்பதே? 5	உரை
	1496. தவள வெண்பிறை தோய்தரு தாழ்பொழில் சூழ, நல் திவள மா மணி மாடம் திகழ் தெளிச்சேரியீர்! குவளை போல் கண்ணி துண்ணென, வந்து குறுகிய கவள மால்கரி எங்ஙனம் நீர் கையின் காய்ந்ததே? 6	உரை
	1497. கோடு அடுத்த பொழிலின்மிசைக் குயில் கூவிடும் சேடு அடுத்த தொழிலின் மிகு தெளிச்சேரியீர்! மாடு அடுத்த மலர்க்கண்ணினாள் கங்கை நங்கையைத் தோடு அடுத்த மலர்ச் சடை என்கொல் நீர் சூடிற்றே? 7	உரை
	1498. கொத்து இரைத்த மலர்க் குழலாள், குயில்கோலம் சேர் சித்திரக் கொடி மாளிகை சூழ் தெளிச்சேரியீர்! வித்தகப் படை வல்ல அரக்கன் விறல் தலை, பத்து, இரட்டிக் கரம், நெரித்திட்டது, உம் பாதமே? 8	உரை
	1499. கால் எடுத்த திரைக்கை கரைக்கு எறி கானல் சூழ் சேல் அடுத்த வயல் பழனத் தெளிச்சேரியீர்! மால் அடித்தலம், மா மலரான் முடி, தேடியே ஓலம் இட்டிட, எங்ஙனம் ஓர் உருக் கொண்டதே? 9	உரை
	1500. மந்திரம் தரு மா மறையோர்கள், தவத்தவர், செந்து இலங்கு மொழியவர், சேர் தெளிச்சேரியீர்! வெந்தல் ஆகிய சாக்கியரோடு சமணர்கள் தம் திறத்தன நீக்குவித்தீர்; ஓர் சதிரரே? 10	உரை
	1501. திக்கு உலாம், பொழில் சூழ், தெளிச்சேரி எம் செல்வனை, மிக்க காழியுள் ஞானசம்பந்தன் விளம்பிய தக்க பாடல்கள்பத்தும் வல்லார்கள், தட முடித் தொக்க வானவர் சூழ இருப்பவர், சொல்லிலே. 11	உரை