தொடக்கம்
2.20 திருஅழுந்தூர் - இந்தளம்
	1677. தொழும் ஆறு வல்லார், துயர் தீர நினைந்து எழும் ஆறு வல்லார், இசை பாட விம்மி அழும் ஆறு வல்லார், அழுந்தை மறையோர் வழிபாடு செய் மா மடம் மன்னினையே. 1	உரை
	1678. கடல் ஏறிய நஞ்சு அமுதுஉண்டவனே! உடலே! உயிரே! உணர்வே! எழிலே! அடல் ஏறு உடையாய்! அழுந்தை மறையோர் விடலே! தொழ, மா மடம் மேவினையே. 2	உரை
	1679. கழிகாடலனே! கனல் ஆடலினாய்! பழிபாடு இலனே! அவையே பயிலும் அழிபாடு இலராய், அழுந்தை மறையோர் வழிபாடுசெய் மா மடம் மன்னினையே. 3	உரை
	1680. வானே! மலையே! என மன் உயிரே! தானே தொழுவார் தொழு தாள் மணியே! ஆனே! சிவனே! அழுந்தையவர், "எம் மானே!" என, மா மடம் மன்னினையே. 4	உரை
	1681. அலை ஆர் புனல் சூழ் அழுந்தைப் பெருமான்! நிலை ஆர் மறியும், நிறை வெண்மழுவும், இலைஆர் படையும்(ம்), இவை ஏந்து செல்வ! நிலையா அது கொள்க என, நீ நினையே! 5	உரை
	1682. நறவு ஆர் தலையின் நயவா! உலகில் பிறவாதவனே! பிணி இல்லவனே! அறை ஆர் கழலாய்! அழுந்தை மறையோர் மறவாது எழ, மா மடம் மன்னினையே. 6	உரை
	1683. தடுமாறு வல்லாய்! தலைவா! மதியம் சுடும் ஆறு வல்லாய்! சுடர் ஆர் சடையில் அடும் ஆறு வல்லாய்! அழுந்தை மறையோர் நெடு மா நகர் கைதொழ, நின்றனையே. 7	உரை
	1684. பெரியாய்! சிறியாய்! பிறையாய்! மிடறும் கரியாய்! கரிகாடு உயர்வீடு உடையாய்! அரியாய்! எளிவாய்! அழுந்தை மறையோர் வெரியார் தொழ, மா மடம் மேவினையே. 8	உரை
	1685. மணி நீள் முடியால் மலையை அரக்கன் தணியாது எடுத்தான் உடலம் நெரித்த அணி ஆர் விரலாய்! அழுந்தை மறையோர் மணி மா மடம் மன்னி இருந்தனையே. 9	உரை
	1686. முடி ஆர் சடையாய்! முனம்நாள், இருவர் நெடியான், மலரான் நிகழ்வால் இவர்கள் அடி மேல் அறியார்; அழுந்தை மறையோர் படியால் தொழ, மா மடம் பற்றினையே. 10	உரை
	1687. அரு ஞானம் வல்லார் அழுந்தை மறையோர் பெரு ஞானம் உடைப் பெருமான் அவனைத் திருஞானசம்பந்தன செந்தமிழ்கள், உருஞானம் உண்டுஆம், உணர்ந்தார்தமக்கே. 11	உரை