தொடக்கம்
2.21 திருக்கழிப்பாலை - இந்தளம்
	1688. புனல் ஆடிய புன்சடையாய்! அரணம் அனல் ஆக விழித்தவனே! அழகு ஆர் கனல் ஆடலினாய்! கழிப்பாலை உளாய்! உன வார் கழல் கைதொழுது உள்குதுமே. 1	உரை
	1689. துணைஆக ஒர் தூ வள மாதினையும் இணைஆக உகந்தவனே! இறைவா! கணையால் எயில் எய் கழிப்பாலை உளாய்! இணை ஆர் கழல் ஏத்த, இடர் கெடுமே. 2	உரை
	1690. நெடியாய்! குறியாய்! நிமிர்புன்சடையின் முடியாய்! சுடுவெண்பொடி முற்று அணிவாய்! கடி ஆர் பொழில் சூழ் கழிப்பாலை உளாய்! அடியார்க்கு அடையா, அவலம் அவையே. 3	உரை
	1691. எளியாய்! அரியாய்! நிலம், நீரொடு, தீ, வளி, காயம், என வெளி மன்னிய தூ ஒளியாய்! உனையே தொழுது உன்னுமவர்க்கு அளியாய்! கழிப்பாலை அமர்ந்தவனே! 4	உரை
	1692. நடம் நண்ணி, ஒர் நாகம் அசைத்தவனே! விடம் நண்ணிய தூ மிடறா! விகிர்தா! கடல் நண்ணு கழிப்பதி காவலனே! உடல் நண்ணி வணங்குவன், உன் அடியே. 5	உரை
	1693. பிறை ஆர் சடையாய்! பெரியாய்! பெரிய(ம்) மறை ஆர்தரு வாய்மையினாய்! உலகில் கறை ஆர் பொழில் சூழ் கழிப்பாலை உளாய்! இறை ஆர் கழல் ஏத்த, இடர் கெடுமே. 6	உரை
	1694. முதிரும் சடையின்முடிமேல் விளங்கும் கதிர் வெண்பிறையாய்! கழிப்பாலை உளாய்! எதிர்கொள் மொழியால் இரந்து ஏத்துமவர்க்கு அதிரும் வினைஆயின ஆசு அறுமே. 7	உரை
	1695. எரி ஆர் கணையால் எயில் எய்தவனே! விரி ஆர்தரு வீழ்சடையாய்! இரவில் கரி காடலினாய்! கழிப்பாலை உளாய்! உரிதுஆகி வணங்குவன், உன் அடியே. 8	உரை
	1696. நல நாரணன், நான்முகன், நண்ணல் உற, கனல் ஆனவனே! கழிப்பாலை உளாய்! உன வார் கழலே தொழுது உன்னுமவர்க்கு இலதுஆம், வினைதான்; எயில் எயதவனே! 9	உரை
	1697. தவர் கொண்ட தொழில் சமண்வேடரொடும், துவர் கொண்டன நுண்துகில் ஆடையரும், அவர் கொண்டன விட்டு, அடிகள் உறையும் உவர் கொண்ட கழிப்பதி உள்குதுமே. 10	உரை
	1698. கழி ஆர் பதி காவலனைப் புகலிப் பழியா மறை ஞானசம்பந்தன சொல் வழிபாடு இவை கொண்டு, அடி வாழ்த்த வல்லார், கெழியார், இமையோரொடு; கேடு இலரே. 11	உரை