தொடக்கம்
2.29 திருப்புகலி திருவிராகம் - இந்தளம்
	1775. முன்னிய கலைப்பொருளும், மூஉலகில் வாழ்வும், பன்னிய ஒருத்தர் பழ ஊர் வினவின் ஞாலம் துன்னி இமையோர்கள் துதிசெய்து முன் வணங்கும் சென்னியர் விருப்புஉறு திருப் புகலிஆமே. 1	உரை
	1776. வண்டு இரை மதிச் சடை மிலைத்த புனல் சூடிப் பண்டு எரி கை ஆடு பரமன் பதிஅது என்பர் புண்டரிக வாசம் அது வீச, மலர்ச்சோலைத் தெண்திரை கடல் பொலி திருப் புகலிஆமே. 2	உரை
	1777. பா அணவு சிந்தையவர் பத்தரொடு கூடி, நா அணவும் அந்தணன் விருப்புஇடம் அது என்பர் பூ அணவு சோலை, இருள் மாலை எதிர் கூர, தே வண விழா வளர் திருப் புகலிஆமே. 3	உரை
	1778. மை தவழும் மா மிடறன், மாநடம் அது ஆடி, கை வளையினாளொடு கலந்த பதி என்பர் செய் பணி பெருத்து எழும் உருத்திரர்கள் கூடி, தெய்வம் அது இணக்கு உறு திருப் புகலிஆமே. 4	உரை
	1779. முன்னம் இரு மூன்றுசமயங்கள் அவை ஆகி, பின்னை அருள்செய்த பிறையாளன் உறை கோயில் புன்னைய மலர்ப்பொழில்கள் அக்கின் ஒளி காட்ட, செந்நெல் வயல் ஆர்தரு திருப் புகலிஆமே. 5	உரை
	1780. வங்கம் மலியும் கடல் விடத்தினை நுகர்ந்த அங்கணன் அருத்தி செய்து இருக்கும் இடம் என்பர் கொங்கு அண வியன் பொழிலின் மாசு பனி மூச, தெங்கு அணவு தேன் மலி திருப் புகலிஆமே. 6	உரை
	1781. நல்குரவும் இன்பமும் நலங்கள் அவை ஆகி, வல்வினைகள் தீர்த்துஅருளும் மைந்தன் இடம் என்பர் பல்கும் அடியார்கள் படி ஆர இசை பாடி, செல்வ மறையோர் உறை திருப் புகலிஆமே. 7	உரை
	1782. பரப்புஉறு புகழ்ப் பெருமையாளன், வரைதன்னால் அரக்கனை அடர்த்து அருளும் அண்ணல், இடம் என்பர் நெருக்குஉறு கடல் திரைகள் முத்தம்மணி சிந்த, செருக்குஉறு பொழில் பொலி திருப் புகலிஆமே. 8	உரை
	1783 கோடலொடு கூன்மதி குலாய சடைதன்மேல் ஆடுஅரவம் வைத்துஅருளும் அப்பன், இருவர்க்கும் நேட எரி ஆகி, இருபாலும் அடி பேணித் தேட, உறையும் நகர் திருப் புகலி ஆமே. 9	உரை
	1784. கற்ற மணர், உற்று உலவு தேரர், உரைசெய்த குற்றம் மொழி கொள்கைஅது இலாத பெருமான் ஊர் பொன் தொடி மடந்தையரும், மைந்தர், புலன் ஐந்தும், செற்றவர், விருப்புஉறு திருப் புகலிஆமே. 10	உரை
	1785. செந்தமிழ் பரப்புஉறு திருப் புகலிதன்மேல், அந்தம் முதல் ஆகி நடுவுஆய பெருமானைப் பந்தன் உரை செந்தமிழ்கள்பத்தும் இசை கூர வந்த வணம் ஏத்துமவர் வானம் உடையாரே. 11	உரை