தொடக்கம்
14. திருப்பைஞ்ஞீலி - காந்தாரபஞ்சமம்
	2943. ஆரிடம் பாடலர், அடிகள், காடு அலால் ஓர் இடம் குறைவு இலர், உடையர் கோவணம், நீர் இடம் சடை, விடை ஊர்தி, நித்தலும் பாரிடம் பணி செயும், பயில் பைஞ்ஞீலியே.     1	உரை
	2944. மருவு இலார் திரிபுரம் எரிய, மால்வரை, பரு விலாக் குனித்த பைஞ்ஞீலி மேவலான், உரு இலான், பெருமையை உளம் கொளாத அத் திரு இலார் அவர்களைத் தெருட்டல் ஆகுமே?     2	உரை
	2945. அம் சுரும்பு அணி மலர் அமுதம் மாந்தி, தேன் பஞ்சுரம் பயிற்று பைஞ்ஞீலி மேவலான்- வெஞ்சுரம்தனில், உமை வெருவ, வந்தது ஓர் குஞ்சரம் பட, உரி போர்த்த கொள்கையே!     3	உரை
	2946. கோடல்கள் புறவு அணி கொல்லை முல்லைமேல் பாடல் வண்டு இசை முரல் பயில் பைஞ்ஞீலியார் பேடு அலர், ஆண் அலர், பெண்ணும் அல்லது, ஓர் ஆடலை உகந்த எம் அடிகள் அல்லரே!     4	உரை
	2947. விழி இலா நகுதலை, விளங்கு இளம்பிறை, சுழியில் ஆர் வருபுனல் சூழல் தாங்கினான்- பழி இலார் பரவு பைஞ்ஞீலி பாடலான்; கிழி இலார் கேண்மையைக் கெடுக்கல் ஆகுமே?     5	உரை
	2948. விடை உடைக் கொடி வலன் ஏந்தி, வெண்மழுப் படை உடைக் கடவுள் பைஞ்ஞீலி மேவலான்; துடி இடைக் கலை அல்குலாள் ஓர்பாகமா, சடை இடைப் புனல் வைத்த சதுரன் அல்லனே!     6	உரை
	2949. தூயவன், தூய வெண் நீறு மேனிமேல் பாயவன்-பாய பைஞ்ஞீலி கோயிலா மேயவன்; வேய் புரை தோளி பாகமா ஏயவன், எனைச் செயும் தன்மை என்கொலோ?     7	உரை
	2950. தொத்தின தோள் முடி உடையவன் தலை- பத்தினை நெரித்த பைஞ்ஞீலி மேவலான், முத்தினை முறுவல் செய்தாள் ஒர்பாகமாப் பொத்தினன், திருந்து அடி பொருந்தி வாழ்மினே!     8	உரை
	2951. நீர் உடைப் போது உறைவானும் மாலும் ஆய், சீர் உடைக் கழல் அடி சென்னி காண்கிலர்; பார் உடைக் கடவுள், பைஞ்ஞீலி மேவிய தார் உடைக்கொன்றை அம் தலைவர், தன்மையே!     9	உரை
	2952. பீலியார் பெருமையும், பிடகர் நூன்மையும், சாலியாதவர்களைச் சாதியாதது, ஓர் கோலியா அரு வரை கூட்டி எய்த பைஞ்- ஞீலியான் கழல் அடி நினைந்து வாழ்மினே!     10	உரை
	2953. கண் புனல் விளை வயல் காழிக் கற்பகம் நண்பு உணர் அருமறை ஞானசம்பந்தன் பண்பினர் பரவு பைஞ்ஞீலி பாடுவார் உண்பின உலகினில், ஓங்கி வாழ்வரே.     11	உரை