தொடக்கம்
35. திருத் தென்குடித்திட்டை - கொல்லி
	3170. முன்னை நால் மறை அவை முறை முறை, குறையொடும், தன்ன தாள் தொழுது எழ நின்றவன் தன் இடம் மன்னு மா காவிரி வந்து அடி வருட, நல் செந்நெல் ஆர் வளவயல்-தென்குடித்திட்டையே.     1	உரை
	3171. மகரம் ஆடும் கொடி மன் மத வேள் தனை, நிகரல் ஆகா நெருப்பு எழ, விழித்தான் இடம் பகர வாள் நித்திலம், பல்மகரத்தோடும், சிகர மாளிகை தொகும் தென்குடித்திட்டையே.     2	உரை
	3172. கருவினால் அன்றியே கரு எலாம் ஆயவன், உருவினால் அன்றியே உருவு செய்தான், இடம் பருவ நாள், விழவொடும் பாடலோடு ஆடலும் திருவினால் மிகு புகழ்த் தென்குடித்திட்டையே.     3	உரை
	3173. உள்-நிலாவு ஆவி ஆய் ஓங்கு தன் தன்மையை விண்ணிலார் அறிகிலா வேதவேதாந்தன் ஊர் எண் இல் ஆர் எழில் மணிக் கனக மாளிகை இளந் தெண் நிலா விரிதரும் தென்குடித்திட்டையே.     4	உரை
	3174. வருந்தி வானோர்கள் வந்து அடைய, மா நஞ்சு தான் அருந்தி, ஆர் அமுது அவர்க்கு அருள் செய்தான் அமரும் ஊர் செருந்தி, பூமாதவிப் பந்தர், வண் செண்பகம், திருந்து நீள் வளர் பொழில்-தென்குடித்திட்டையே.     5	உரை
	3175. ஊறினார், ஓசையுள் ஒன்றினார், ஒன்றி மால் கூறினார், அமர்தரும் குமரவேள்தாதை ஊர் ஆறினார் பொய் அகத்து, ஐஉணர்வு எய்தி மெய் தேறினார், வழிபடும் தென்குடித்திட்டையே.     6	உரை
	3176. கான் அலைக்கும்(ம்) அவன் கண் இடந்து அப்ப, நீள வான் அலைக்கும் தவத் தேவு வைத்தான் இடம் தான் அலைத் தெள் அம் ஊர், தாமரைத் தண்துறை தேன் அலைக்கும் வயல், தென்குடித்திட்டையே.     7	உரை
	3177. மாலொடும் பொரு திறல் வாள் அரக்கன் நெரிந்து ஓல் இடும்படி விரல் ஒன்று வைத்தான் இடம் காலொடும் கனகமூக்கு உடன்வர, கயல் வரால் சேலொடும் பாய் வயல்-தென்குடித்திட்டையே.     8	உரை
	3178. நாரணன் தன்னொடு நான்முகன்தானும் ஆய், காரணன்(ன்) அடி முடி காண ஒண்ணான் இடம் ஆரணம் கொண்டு பூசுரர்கள் வந்து அடி தொழ, சீர் அணங்கும் புகழ்த் தென்குடித்திட்டையே.     9	உரை
	3179. குண்டிகைக் கை உடைக் குண்டரும், புத்தரும், பண்டு உரைத்து ஏயிடும் பற்று விட்டீர், தொழும் வண்டு இரைக்கும் பொழில்-தண்டலைக் கொண்டல் ஆர் தெண்திரைத் தண்புனல்,-தென்குடித்திட்டையே!     10	உரை
	3180. தேன் நல் ஆர் சோலை சூழ் தென்குடித்திட்டையை, கானல் ஆர் கடிபொழில் சூழ்தரும் காழியுள ஞானம் ஆர் ஞானசம்பந்தன செந்தமிழ் பால் நல் ஆர் மொழி வலார்க்கு, இல்லை ஆம்,                                                    பாவமே.     11	உரை