தொடக்கம்
94. திருவெங்குரு - திருமுக்கால் - சாதாரி
	3810. விண்ணவர் தொழுது எழு வெங்குரு மேவிய சுண்ண வெண்பொடி அணிவீரே; சுண்ண வெண்பொடி அணிவீர்! உம தொழு கழல் எண்ண வல்லார் இடர் இலரே.      1	உரை
	3811. வேதியர் தொழுது எழு வெங்குரு மேவிய ஆதிய அருமறையீரே; ஆதிய அருமறையீர்! உமை அலர்கொடு ஓதியர் உணர்வு உடையோரே.      2	உரை
	3812. விளங்கு தண்பொழில் அணி வெங்குரு மேவிய இளம்பிறை அணி சடையீரே; இளம்பிறை அணி சடையீர்! உமது இணை அடி உளம் கொள, உறு பிணி இலரே.      3	உரை
	3813. விண்டு அலர் பொழில் அணி வெங்குரு மேவிய வண்டு அமர் வளர் சடையீரே; வண்டு அமர் வளர் சடையீர்! உமை வாழ்த்தும் அத் தொண்டர்கள் துயர், பிணி, இலரே.      4	உரை
	3814. மிக்கவர் தொழுது எழு வெங்குரு மேவிய அக்கினொடு அரவு அசைத்தீரே; அக்கினொடு அரவு அசைத்தீர்! உமது அடி இணை தக்கவர் உறுவது தவமே.      5	உரை
	3815. வெந்த வெண்பொடி அணி வெங்குரு மேவிய அந்தம் இல் பெருமையினீரே; அந்தம் இல் பெருமையினீர்! உமை அலர்கொடு சிந்தை செய்வோர் வினை சிதைவே.      6	உரை
	3816. விழ மல்கு பொழில் அணி வெங்குரு மேவிய அழல் மல்கும் அங்கையினீரே; அழல் மல்கும் அங்கையினீர்! உமை அலர்கொடு தொழ, அல்லல் கெடுவது துணிவே.      7	உரை
	3817. வித்தக மறையவர் வெங்குரு மேவிய மத்த நல் மலர் புனைவீரே; மத்த நல் மலர் புனைவீர்! உமது அடி தொழும் சித்தம் அது உடையவர் திருவே!      8	உரை
	3818. மேலவர் தொழுது எழு வெங்குரு மேவிய ஆல நல் மணிமிடற்றீரே; ஆல நல் மணிமிடற்றீர்! உமது அடி தொழும் சீலம் அது உடையவர் திருவே!      9	உரை
	3819. விரை மல்கு பொழில் அணி வெங்குரு மேவிய அரை மல்கு புலி அதளீரே; அரை மல்கு புலி அதளீர்! உமது அடி இணை உரை மல்கு புகழவர் உயர்வே!      10	உரை