தொடக்கம்
	4.64 திருவீழிமிழலை திருநேரிசை 619 பூதத்தின் படையர்; பாம்பின் பூணினர்; பூண நூலர் சீதத்தின் பொலிந்த திங்கள் கொழுந்தர்; நஞ்சு அழுந்து கண்டர்; கீதத்தின் பொலிந்த ஓசைக் கேள்வியர்; வேள்வியாள வேதத்தின் பொருளர்-வீழிமிழலையுள் விகிர்தனாரே.	உரை
	620 காலையின் கதிர்செய் மேனி, கங்குலின் கறுத்த கண்டர் மாலையின் மதியம் சேர்ந்த மகுடத்தர்; மதுவும் பாலும் ஆலையில் பாகும் போல அண்ணித் திட்டு, -அடியார்க்கு,-என்றும் வேலையின் அமுதர்-வீழிமிழலையுள் விகிர்தனாரே.	உரை
	621 வரும் தினம், நெருநல், இன்று ஆய், வழங்கின நாளர்; ஆல்கீழ் இருந்து நன் பொருள்கள் நால்வர்க்கு இயம்பினர்; இருவரோடும் பொருந்தினர்; பிரிந்து தம்பால் பொய்யர் ஆம் அவர்கட்கு என்றும் விருந்தினர்-திருந்து வீழிமிழலையுள் விகிர்தனாரே.	உரை
	622 நிலை இலா ஊர் மூன்று ஒன்ற-நெருப்பு, -அரி காற்று அம்பு ஆக, சிலையும் நாண் அதுவும் நாகம் கொண்டவர்; தேவர் தங்கள் தலையினால்-தரித்த என்பும், தலைமயிர் வடமும், பூண்ட விலை இலா வேடர்-வீழிமிழலையுள் விகிர்தனாரே.	உரை
	623 மறை இடைப் பொருளர்; மொட்டின் மலர் வழி வாசத் தேனர் கறவு இடைப் பாலின் நெய்யர்; கரும்பினில் கட்டியாளா பிறை இடைப் பாம்பு கொன்றைப் பிணையல் சேர் சடையுள் நீரர் விறகு இடைத் தீயர்-வீழிமிழலையுள் விகிர்தனாரே.	உரை
	624 எண் அகத்து இல்லை அல்லர்; உளர் அல்லர்; இமவான் பெற்ற பெண் அகத்தர்; ஐயர்; காற்றில் பெரு வலி இருவர் ஆகி, மண் அகத்து ஐவர்; நீரில் நால்வர்; தீ அதனில் மூவர் விண் அகத்து ஒருவர்-வீழிமிழலையுள் விகிர்தனாரே.	உரை
	625 சந்து அணி கொங்கையாள் ஓர் பங்கினர்; சாமவேதர் எந்தையும் எந்தை தந்தை தந்தையும் ஆய ஈசர்; அந்தியோடு உதயம் அந்தணாளர் ஆன் நெய்யால் வேட்கும் வெந்தழல் உருவர் வீழிமிழலையுள் விகிர்தனாரே.	உரை
	626 நீற்றினை நிறையப் பூசி, நித்தல் ஆயிரம் பூக்கொண்டு(வ்) ஏற்றுழி, ஒரு நாள் ஒன்று குறைய, கண் நிறைய இட்ட ஆற்றலுக்கு ஆழி நல்கி, அவன் கொணர்ந்து இழிச்சும் கோயில் வீற்றிருந்து அளிப்பர்-வீழிமிழலையுள் விகிர்தனாரே.	உரை
	627 சித்தி செய்பவர்கட்கு எல்லாம் சேர்வு இடம்; சென்று கூடப் பத்தி செய்பவர்கள் பாவம் பறைப்பவர்; இறப்பு இலாளா முத்து இசை பவள மேனி முதிர் ஒளி நீலகண்டர் வித்தினில் முளையர்-வீழிமிழலையுள் விகிர்தனாரே.	உரை
	628 தருக்கின அரக்கன் தேர் ஊர் சாரதி தடை நிலாது பொருப்பினை எடுத்த தோளும் பொன் முடி பத்தும் புண் ஆய் நெரிப்புண்டு அங்கு அலறி மீண்டு நினைந்து அடி பரவ, தம் வாள விருப்பொடும் கொடுப்பர் வீழிமிழலையுள் விகிர்தனாரே.	உரை