முகப்பு தொடக்கம்   பாடல் எண் : 10 - 8 ஆறு சூடும் அணிமறைக் காடரோ கூறு மாதுமைக் கீந்த குழகரோ ஏற தேறிய எம்பெரு மானிந்த மாறி லாக்கத வம்வலி நீக்குமே. 8 பொ-ரை: கங்கையாற்றைச் சடையிற் சூடும் மறைக்காட்டுறையும் பெருமானே! ஒரு கூற்றை உமைக்கு ஈந்த இளையவரே! விடையேறிய எம்பெருமானே! இந்த மாறுபாடில்லாத கதவின் வலியினை நீக்கித் திறந்தருள்வீராக. கு-ரை: ஆறு - கங்கை. அணி - அழகு. கூறு - உடம்பில் ஒரு பாதி. மாதுஉமை - பெண்ணாகிய உமையம்மைக்கு. குழகர் - இளையர். மாறிலா - ஒப்பில்லாத. முன் மறைகள் அடைத்த நிலையினின்று மாறுதலின்றி உள்ள எனினும் ஆம்.