முகப்பு தொடக்கம்   பாடல் எண் : 44 - 10 வானஞ் சாடு மதியர வத்தொடு தானஞ் சாதுடன் வைத்த சடையிடைத் தேனஞ் சாடிய தெங்கிள நீரொடும் ஆனஞ் சாடிய வாமாத்தூ ரையனே. 10 பொ-ரை: ஆகாயத்தே இருளைச்சிதைக்கும் மதியை அரவொடும் அஞ்சாதபடி நட்புக் கொள்ள வைத்தவர். தேன் முதலிய பஞ்சாமிர்தத்தொடும் இளநீர் பஞ்சகவ்வியம் முதலியவற்றை அபிடேகம் கொண்டவர் ஆமாத்தூர்ப்பெருமான். கு-ரை: வானம் - ஆகாயத்தே. சாடும் - இருளைச் சிதைக்கும். தானஞ்சாது - மதியும் அரவும் தம்முள் கொண்ட பகைபற்றி அஞ்சாதபடி. உடன் - ஒருசேர. தேன் அஞ்சு - தேன் முதலிய அஞ்சு; பஞ்சாமிர்தம். ஆனஞ்சு - பஞ்சகவ்வியம். தெங்கிள நீரொடும் ஆடிய ஐயன்; ஆனஞ்சாடிய ஐயன் என்க.