மூலம்   பாடல் எண் :1197 ஞால மேவிசும் பேநலந் தீமையே கால மேகருத் தேகருத் தாற்றொழும் சீல மேதிரு வீழி மிழலையுள் கோல மேயடி யேனைக் குறிக்கொளே. 3 பொ-ரை: உலகமே! விண்ணே! நன்மையே! தீமையே! காலமே! கருத்தே! கருத்தாற்றொழும் சீலமே! திருவீழிமிழலையுள் வீற்றிருக்கும் கோலமே! அடியேனைக் குறிக்கொண்டு காத்தருள்வாயாக. கு-ரை: நிலனும் வானும், நலமும் தீங்கும், இவையானைத்திற்கும் ஆதாரமாய் நின்று நிகழச் செய்கின்ற காலமும், எண்ணும் எண்ணமும், குறிக்கொண்டு தொழுதுவரும் நல்லொழுக்கமும் ஆகிய இவையனைத்துமாய் உள்ளவன் முதல்வன். சீலம் - இடையறவு படுதலின்றி நெறிப்பட்டு ஒழுகும் நல்லொழுக்கம். கோலம் - அழகியதிருவுரு, மணவாளக்கோலம்.