270.

ஒட்டா வகைஅவுணர் முப்புரங்கள் ஓர் அம்பால்
பட்டாங் கழல்விழுங்க எய்துகந்த பண்பினார்
சிட்டார் மறைஓவாத் தில்லைச்சிற் றம்பலவர்
கொட்டா நடமாடக் கோல்வளைகள் கொள்வாரே.     (3)
 

270. ஒட்டா வகை அவுணர்-பொருந்தாத வகைமையை (பகைமைக்
குணத்தை)  உடைய  அசுரர்.  ‘ஓர்  அம்பால் எய்து’ என இயையும்,
‘அழல்   பட்டு   விழுங்க’   என   மாற்றுக.  ஆங்கு,  அசைநிலை.
உகந்த-தேவர்களை   விரும்புகின்ற.   ‘சிட்டம்’   என்பதன்  ஈற்றில்
அம்முக்குறைந்து   நின்றது.   சிட்டம்-உயர்வு   :   கொட்டு  ஆம்
நடம்-மத்தளம்   முதலியவற்றின்   முழக்கம்   பொருந்திய  நடனம்.
ஆட-ஆடுதலால்.    ‘ஆடி’    எனப்   பாடம்   ஓதுதல்  சிறக்கும்.
‘கொடியோரை அழித்து நல்லோரை விரும்பிக் காக்கும் பண்புடையார்,
என் கோல்வளைகளைக் கொள்வார் ; இது தக்கதோ’ என்றபடி.