244.

மாலோ டயனும்அமரர் பதியும்
   வந்து வணங்கிநின்
றால கண்டா அரனே யருளாய்
   என்றென் றவரேத்தச்
சேலா டும்வயல் தில்லை மல்கு
   சிற்றம் பலந்தன்னுள்
பாலா டும்முடிச் சடைகள் தாழப்
   பரமன் ஆடுமே.                             (9)
 

244. அமரர்    பதி-தேவர்கள் தலைவன்; இந்திரன், ஆலம்-நஞ்சு.
’ஆலா  கண்டா’ எனப்  பாடம்  ஓதி,  ‘ஆலால’  என்பது  குறைந்து
நின்றதாக உரைப்பினும் இழுக்கில்லை. ‘‘அவர்’’ என மீட்டும்  கூறியது,
அவரது  பெருமை  குறித்து.  ‘‘மல்கு சிற்றம்பலம்’’ என்பது  முன்னும்
வந்தது  (6).  பால் ஆடும்-சுற்றிலும் சுழன்றாடுகின்ற. ‘பாலாடும் சடை’
என இயையும். ‘பாலாடும் முடி’ என்று இயைத்து, ‘பாலில்  மூழ்குகின்ற
சென்னி’ எனவும் உரைப்பர். தாழ-நீண்டு விளங்க.