277.

நோக்காத தன்மையால் நோக்கிலோம் யாம்என்று
மாற்காழி ஈந்து மலரோனை நிந்தித்துச்
சேக்கா தலித்தேறுந் தில்லைச்சிற் றம்பலவர்
ஊர்க்கேவந் தென்வளைகள் கொள்வாரோ ஒண்ணுதலீர்! (10)
 

277,     ‘‘மாற்கு ஆழி ஈந்து’’ என்பதை, ‘‘நிந்தித்து‘‘   என்பதன்
பின்னர்க்  கூட்டுக.  நோக்காத  தன்மையால்-நீ எம்மை  முதற்கடவுள்
என்று   மதித்தலைச்  செய்யாத  காரணத்தால்.  யாம்  நோக்கிலோம்
என்று-   நாம்   உன்னை   நம்  அடியவருள்  ஒருவனாகக்  கருதி
இரங்கிலோம்    என்று    சொல்லி.   மலரோன்-பிரமன்.  அவனை
நிந்தித்தமை.    அவனது   நடுத்தலையை   உகிரால்    அறுத்தமை.
‘திருமாலுக்கு  ஆழி  (சக்கரம்) ஈந்ததும், அறக் கடவுளை ஊர்தியாகக்
கொண்டதும் அவர்களது வழிபாட்டினால்’ என்பது பிரமனுக்குக் கூறிய
குறிப்புப் பற்றி வருவித்துக்கொள்ளப்படும். ஊர்க்கே வந்து - ஊரினுள்
தானே வந்து, ‘வழிபடுபவர்க்கு அளியும், வழிபடாதோர்க்குத் தெறலும்
செய்கின்ற  இவர் வழிபாடுடைய என்மாட்டுத் தெறலைச் செய்கின்றது
என்றோ’ என்பதாம்.