251.

இறைவனை என்கதியை என்னு
   ளேயுயிர்ப் பாகிநின்ற
மறைவனை மண்ணும்விண்ணும் மலி
   வான்சுட ராய்மலிந்த
சிறையணி வண்டறையுந் தில்லை
   மாநகர்ச் சிற்றம்பலம்
நிறையணி யாம்இறையை நினைத்
   தேன்இனிப் போக்குவனே !                    (5)
 

251. கதி-புகலிடம்.‘‘என்னுளே உயிர்ப்பாய்... .. ..நிற்கும்’’ என்ற
அப்பர்  திருமொழி  இங்கு  நோக்கத்தக்கது  (5-21-1.) மறை-மறைந்து
நிற்கும்  பொருள்.  ‘துறைவன்’ என்பதுபோல, ‘‘இறைவன்,  மறைவன்’’
என்றவற்றில்  வகரம்  பெயர்  இடைநிலை.  ‘இறையனை, மறையனை’
எனப்  பாடம்  ஓதுதல்  சிறக்கும். மலி-மகிழ்தற்கு ஏதுவான. ‘சுடராய்
அணியாம்  இறை’  எனவும்,  ‘மலிந்த  வண்டு’  எனவும்   இயையும்.
மலிந்த-நிறைந்த,     சிறை     அணி-சிறகைக்        கொண்டுள்ள,
‘சிற்றம்பலத்துக்கு’  எனத்  தொகுக்கப்பட்ட  உருபை  விரிக்க.  நிறை
அணி-மிக்க  அழகு.  போக்குவனே-என்  உள்ளத்தினின்றும் போக்கி
விடுவேனோ; ‘மறப்பேனோ’ என்றபடி.