முகப்பு

தொடக்கம்

172. ஆண்டகை யருளி னோக்கின் வெள்ளத்து                       ளலைந்தோ மென்பார்     தாண்டிய பரியு நம்பாற் றகுதியி னடந்த                                தென்பார் பூண்டயங் கிவனே காணும் புண்ணிய மூர்த்தி                                யென்பார் ஈண்டிய மடவார் கூட்ட மின்னன விசைப்பச்                                சென்றார். 26      (இ-ள்.) வெளிப்படை. ஆண்தகையாகிய இவரது அருள் நோக்கப் பெருக்கில் அகப்பட்டு மீளும் வகை யறியாது என்றார் சிலர்; இவர் ஏறிவரும் குதிரையும் தகுதிபெற நம்மிடம் போந்தது என்றார் சிலர்; அணிகள் பூண்ட இவரே நாம் கண்டு வாழும் புண்ணிய மூர்த்தி என்றார் சிலர்; அங்குக் கூடிய பலப்பல மடவாரும் இவ்வாறு பாராட்டிப் பேச நம்பியாரூரர் சென்றனர்.      (வி-ரை.) ஆண்டகை - ஆண்மக்களிலேமிக்க பெருந்தகை. அருளின் நோக்கின் வெள்ளம் - பார்வையாகிய அருள்வெள்ளம். தம்பிரான் தோழராதலின் அருள் என்றார். அலைதல் - கரை காணாது திளைத்தல். அருள் இல் நோக்கம் - அருளில்லாத நோக்கம் என்று முரைப்பர், அருளுடன்கூடிய நோக்கமாயின் அலைந்தோமென்னாராதலின்.      தாண்டிய பரியும் நம்பால் தகுதியின் அடைந்தது - பிற இடங்களிலெல்லாம் தாண்டிச் செல்லும் தன்மையுடைய அவரது குதிரையும் நமது தகுதி நோக்கி அவ்வாறு தாண்டிச் செல்லாமல் நமக்கு இவரது காட்சி தரும் பொருட்டு நடந்து வந்தது என்பார் தாண்டிய பரியும் நடந்தது என்றார்.      தகுதியில் - அருள் பெறுவார் தகுதிக் கேற்றபடி என்றுரைத்தலுமாம். நமது மென்மை, விருப்பம் முதலிய தகுதிநோக்கி. “வேண்டுநடை நடக்கும் வெள்ளே றேறி“ என்ற தேவாரமும் காண்க. அருளின் ஆண்டகையைப் பரித்ததாதலின் அதன் தகுதிக்கேற்ப என்றுமாம்.      பூண் தயங்கு இவன் - அணிகள் கிடந்தசையும் மேனியுடைய இவர். இவரது இயற்கை யழகு பூண்களுக்கு இல்லாமையால் அவை தயங்குதற்கு இடமாகிய மேனியுடையார் என்றதும் குறிப்பு.      காணும் புண்ணிய மூர்த்தி - காணத்தகுந்த புண்ணிய சொரூபர். புண்ணியமே உருவானவர் சிவபெருமான்; ஆனால் அவர் காணப்பெறாதவர்; இவரோ அவ்வாறன்றிக் காணப்பெறுவர் என்றுரைத்தலுமாம்.      மேற்பாட்டிலே மணங் கண்டு வாழ்ந்தோம் என்ற பெண்கள் தாம் கண்டது போலவே அவரும் யாவரையும் அருளுடன் கண்டனராதலின் அக்காட்சியில் கரை காணாது அலைந்தனர்; அவ்வாறு அலைவாரிடம் பரியும் நடந்து சேர்ந்தது; சேரவே அவரது காட்சியை நேரே கண்டு இவனே காணும் புண்ணியமூர்த்தி என்றனர் - என இக்கருத்துக்களை ஒன்றுபடுத்தி உரைத்துக் கொள்க.      ஈண்டிய - மணங் காணத் திரண்டு கூடிய. இன்னன - இவற்றையும் மற்றும் இவ்வாறான பலவற்றையும். இசைப்பச் சென்றார் - இசைத்துக்கொண்டிருக்கத் தாம் சென்றனர். “பெருகொளி முத்தின் பைம்பொற் சிவிகைமேற் பிள்ளையார்தாம் வருமழ கென்னே என்பார்......“     - திருஞான - புரா - 803 என்று முதலாக வரும் கருத்துக்களை இங்கு வைத்து நோக்குக.      தாண்டியமாவும் - தகுதியினடைந்தது - என்பனவும் பாடங்கள். 26

மேல்