(இ-ள்.) எம்பிராட்டி ... என்று - எமது பெருமாட்டியும்
இவ்வேழுலகங்களையும் பெற்றெடுத்த தாயும் ஆகிய
காமாட்சியம்மையார் தமது பெருமானாகிய இறைவனைத் தனித்தவஞ்
செய்து வெளிப்படக் கண்டு கம்பையாற்றின் கரையிலே பூசித்த
காஞ்சீபுரம் என்னும் பேருடைய; உம்பர் ... உடையது - தேவர்களும்
வந்து வணங்கும் தலத்தையும் அத்தென்றிசை உடையதாம்.

     (வி-ரை.) தென்றிசை - என்ற எழுவாய் வருவித்துரைக்க.

     எம்பிராட்டி - எமது தலைவி - பெருமாட்டி. ஏழுலகு
ஈன்றவளாகிய எம்பிராட்டி என்க.

     தனித்தவத்தால் எய்தி - ஒப்பற்ற தவஞ் செய்து அது
காரணமாக இறைவன் வெளிப்படக் கண்டு அடைந்து; தனித்துப்
போந்து தவம் செய்து என்றுமாம். இத்தவத்தின் வரலாறும், வழிபட்ட
வரலாறும் அதனால் உயிர்கள் அடையும் பேறும் திருக்குறிப்புத்
தொண்ட நாயனார் புராணம் 49 முதல் 71 வரை உள்ள
திருப்பாட்டுக்களினாலும், காஞ்சிப் புராணம் முதலியவற்றானும்
அறிக.

     கம்பை - ஆறு. இப்போது இது இங்குப் பூமியின்கீழ் ஓடும்.
பிராட்டி பெருமானை அவர் வெளிப்பட்ட பிருதிவியிலே தாபித்துப்
பூசித்துக்கொண்டு இருக்கும்போது இறைவன் அருளாலே ஆறு
பெருகிவர, அம்மைநடுங்கி இறைவனது திருமேனியை ஆற்றின்
வெள்ளத்திற் போகாதபடி தழுவிக்கொண்டாள் என்பது சரிதம்.
கம்பம் - நடுக்கம்; நடுக்கத்தை உண்டாக்கியதால் கம்பை
எனப்பெற்றதாம். “......வெள்ளங் காட்டி வெருட்டிட வஞ்சி வெருவி
ஓடித் தழுவ வெளிப்பட்ட, கள்ளக்கம்பனை...” என்ற
சுந்தரமூர்த்திகள் தேவாரமும் காண்க. பின்னரும்
“வெருக்கொண்டே” (திருக்குறிப்பு - 63) என்பது காண்க.

     வழிபடு காஞ்சி - வழிபடப்பெற்ற இடமாகிய காஞ்சி.
மேற்காட்டிய சுந்தரமூர்த்திகள் தேவாரப் பதிகத்திலே
பாட்டுத்தோறும் “வழிபடப்பெற்ற” என்ற குறிப்பும் காண்க. இத்
திருப்பதிகத்தின் உட்குறிப்பைக் காட்டுவதற்கு ஆசிரியர் இவ்வாறு
கூறினார் என்றலுமாம்.