(இ-ள்.) துணர்ச்சுரும்ப ... நீண்முல்லை - பூங்கொத்துக்களில்
மொய்த்த வண்டுகளை அலைத்துக்கொண்டு வரும்
பெரும்புனலுடைய கானியாறுகள் இடையிடையே ஓடிப்பரந்து
சென்று, கொல்லையிலுள்ள மெல்லிய இலைகளையுடைய
குருந்தமரத்தின் மேற்படர்ந்த பூம்பந்தர் போன்ற முல்லைக்
கொடிகளின் மெல்லிய புதல்களிற் பதுங்கியிருந்த முயல்களை
உகைத்துப், பின் அடங்குதற்கிடமாகிய நீண்ட முல்லை நிலங்கள்;
சொல்லும் எல்லையின் புறத்தன - மேற்சொல்லிய எல்லையின்
புறத்தில் உள்ளன.

     (வி-ரை.) சொல்லும் எல்லை - தொல்காப்பியனார் வகுத்துச்
சொன்ன நானிலங்களிற் குறிஞ்சியின் எல்லை.

     கானியாறு - பரந்து - புதல் முயல் உகைத்து அடங்கும்,
முல்லை - எல்லையின் - புறத்தன என்று கூட்டிமுடிக்க.

     அடங்கும் முல்லை - அடங்குதற்கிட மாகிய முல்லைநிலம்.

     பூம்பந்தர் - அயலில் பரந்து குடைபோல விரிந்த குருந்த
மரத்தின் மேற்படர்ந்து நிறையப் பூத்தலின் முல்லைக் கொடியானது
பூம்பந்தர் போன்றதென்பதாம். லதா மண்டபம் என்பர் வடவர்.
(லதை - கொடி).

     மெல்இணர்க் குருந்து - மென்பூம்பந்தர் - மென்முல்லை -
மென் புதல் - மென்முயல் - என இவை யாவையும்
மென்மையோடு பொருந்த உரைத்தது காண்க. "குருந்த மேறிக்
கொடிவிடு மாதவி" (கௌசிகம் - திருவாரூர் - 5), "கொல்லை
முல்லை மெல்லரும், பீனும் குற்றாலம்" (குறிஞ்சி - 3) என்ற
ஆளுடையபிள்ளையார் தேவாரங்கள் காண்க.

     பெரும்புனல் - கானியாறு - இடையிடை பரந்து -
முயலுகைத்து - அடங்கும் என்றது காட்டாறுகள் வெள்ளத்தாற்
பெருகுங்காலத்தில் முல்லைநிலக்காடுகளில் பலபக்கமும் பரந்து
செல்வதனால் நீரின் வேகம் குறைந்து நிரந்து செல்லும்; அந்நீர்
மெல்லிய முல்லைப்புதல்களினுட் பரந்து செல்லும்போது அங்குப்
பதுங்கியிருக்கும் மென்மைத் தன்மையுடைய முயல்கள் அந்நீரினால்
துரத்தப்பட்டு அங்கு நின்றும் ஓடும்; இவ்வாறு புதல்கள் முதலிய
பல இடங்களிலும் பரந்து சென்றபின் கான்யாற்றின் பெருநீத்தம்
அடங்கும் (வேகம் குறையும்) என்றதாம்.