(இ-ள்.) வெளிப்படை. வளப்பமுடைய பழைய ஊர்கள்,
குளிர்ச்சியையுடைய பெரிய வயல்களாற் சூழப்பட்ட நீண்ட
பக்கங்களையுடையன; நெற்கூடுகள் நெருங்கிய வீடுகளையுடையன;
விருந்தினர்களை எதிர்கொண்டு உபசரிக்கும் பெருமையில்
நிலைத்த பெருங்குடிகள் இல்லறத்தில் விளங்குதற்கிடமாகிய
மாடங்கள் ஓங்கிய வீதிகளையுடையன.

     (வி-ரை.) மூதூர்கள், மருங்கின; இருக்கைய; மறுகன என்க.

     பணை உடுத்த - பணைகளாற் சூழப்பட்ட, பணை
-பண்ணை. உடுத்தல் - சூழ்தல் என்ற பொருளில் வழங்குவது.

     நெல்லின் கூடு - நெல்லைச் சேமித்து வைக்குமிடம். வைக்கோற் புரியினாலமைத்த குரம்பை. நெல் - மருதக்
கருப்பொருள். மருத நிலமக்களுக்கு இது முதன்மைபெற்ற
உணவுப்பண்டமாதலின் ஊர்களில் நெற்கூடு துன்றிய
இருக்கை என்றார். இருக்கை - வீடு; வயலிடங்களில்
நெற்கூடுகள் அமைத்தலுமுண்டு. நெல்லின் கூடு
நிறைந்தமையே விருந்து எதிர்கொள்ளுதற்கு வேண்டும்
பெருஞ் சாதனமாதலின் இதனை முன்வைத்து ஓதினார்.
"நெற்கூடு" கோட்புலி நாயனார் புராணம் பார்க்க. துன்றுதல்
- மிகுதியாக நெருங்கியிருத்தல். நெல்லினைக்
கூடு கட்டி வீடுகளிற் சேமித்தல் மரபு.

     மனையறம் பிறங்கும் மாடம் ஓங்குதல் வீதிகளுக்குச்
சிறப்பு என்று முடித்தது காண்க. பணையில் நெல் விளைவும்,
நெற்கூடுகளின் உதவியால் விருந்தெதிர் கொள்ளுதலும் உளவாக,
இவையெல்லாம் இல்லற ஒழுக்கத்தால் நிலைபெறுவன என்பதாம்.