(இ-ள்.) வெளிப்படை. எண்ணில் ஆகமங்களையெல்லாம்
சொல்லி யருளிய சிவபெருமான் தாம் விரும்புகின்ற உண்மையாவது
பூசனையேயாகும் என்று சொல்லியருள, (அதனைத் திருவுள்ளங்
கொண்டவராய்ப்) பெண்ணாகியவர்களுள் எல்லாம் நல்லவராய்ப்
பெருந்தவக் கொழுந்து போல்வராகிய உமையம்மையார்
அண்ணலாரைப் பூசை செய்வதற்கு விருப்பங் கொண்டனர்.

     (வி-ரை.) எண் நில் ஆகமம் - அளவுபடுத்தி நிறுத்தப்பட்ட
ஆகமங்கள்; மூலாகமங்கள் 28-ம், உபாகமங்கள் 207-ம் ஆகிய
இவை. மூலாகமங்கள் ஒவ்வொன்றும் அனேக கோடி
கிரந்தங்களையுடையன. "எண்ணி லிருபத்தெண்கோடி நூறாயிரம்"
(பாயிரம் - 58), "எண்ணி லெழுபது கோடி நூறாயிரம்" (மேற்படி
- 60) என்ற திருமூலர் திருமந்திரங்களில் எண்ணில் -
எண்ணிக்கையில் என்ற பொருளில் வந்தபடி இங்கும் அப்பொருள்
கொண்டுரைக்கப்பட்டது.

     எண் நில் - எண்ணத்தினுள் - கருத்தினுள்ளே - நிற்கத்
தக்க என்றுரைப்பினுமமையும். அனேக கோடி கிரந்தங்களை
உடைமையால் எண்ணில் எண்ணில்லாத என்ற பொருள்பட
உரைத்தனர் என்பாருமுண்டு.

     ஆகமம் - ஆ - க - ம - என்றவை முறையே சத்தும்,
சதசத்தும், அசத்துமாகிய பதி பசு பாசம் என்ற முப்பொருள்களையும்
தெரிவிப்பன; எனவே முப்பொருள்களை நிச்சயஞ் செய்து காட்டி
உயிர்களை உய்விப்பன ஆகமம் என்பதாம்.

     ஆதரித்தல் - விரும்புதல். பெண்ணின் நல்லவள் - தமது
நாயகன் விரும்பியதனையே தாமும் விரும்பிச் செய்தல் பெண்மை
நலமுடையார்க்கு இலக்கணமாதலின், இறைவர், பூசனையே தாம்
விரும்புவது என்றுரைத்தருளத், தாமும் அவ்வாறு பூசித்தலையே
விரும்பினார் என்பதாயிற்று. இதுபற்றி இங்கு இத்தன்மையாற்
கூறினார்.

     "ஆதரித்து வழிபடப் பெற்ற" என்ற நம்பிகள் தேவாரங்
காண்க.

     பெருந்தவக் கொழுந்து - பெரிய தவத்தின் கொழுந்து
போல்வார் என்றது, தவத்தினின் விளைந்து இனியும் தவஞ்செய்து
முற்றும் நிலையும், மேலும் தவத்தை உலகத்தில் விளைவித்துத்தரும்
நிலையும் குறித்தது.