(இ-ள்.) வெளிப்படை. ஆளுடைய அம்மையார் தமது
நெஞ்சம் இறைவனைக் காண்பதனையே விரும்பத்,
திருவாக்கினில் எப்பொழுதும் நிகழ்வது திருவைந்
தெழுத்துக்களேயாகச், செந்தாமரைபோலும் கைகளைக் குவித்து
வணங்கி, ஆதரவாகிய அரிய தவத்தினைச் செய்ய, அவரது
தனிப்பெருங் கணவர் தரிப்பரோ? தரியாதவராகிக் குற்றம் நீக்கிய
மாமரத்தினடியில் மலைமகளார் காணும்படி வந்து சிவலிங்கத்
திருமேனி தாங்கி வெளிப்பட்டனர்.

     (வி-ரை.) நெஞ்சம் - என்றதனால் மனமும், திருவாக்கு
என்றதனால் வாக்கும், கைகுவித்து என்றதனால் மெய்யும் ஆக
முக்கரணங்களின் ஒழுக்கமும் ஒன்றித்து நிகழும் தவம்கூறப்பட்டது.
வஞ்சம் - தோன்றாது மறைந்த வஞ்சம் என்றலுமாம். வஞ்சம் -
பொய். பொய்ந்நீக்கிய உண்மை வடிவான என்றலும்பொருந்தும்.