(இ-ள்.) வெளிப்படை. இவ்வாறு எண்ணுதற்கும் அரியவாயின
பெரிய வரங்களைப் பெற்றனராகி, அங்கு எமது பெருமாட்டியார்,
தமது பெருமான் மகிழ்ந்தருளும்படி இவ்வுலகத்திற் பூசை செய்து
அப்பயனை உயிர்களுக்கு அருளியதோடு, இல்லற ஒழுக்கத்தை
உலகிற் பெருகச் செய்யும் கருணையினால், நிலைபெற்ற உயிர்கள்
எல்லாம் பெருகுமாறு விரும்பிய காதலினால், நீடிய
வாழ்க்கைக்குரியதாகிய புண்ணியத் திருக்காமக்கோட்டத்தில்
எழுந்தருளியிருந்து, முப்பத்திரண்டு அறங்களையும் வளர்க்கின்றார்.

     (வி-ரை.) எண்ணரும் பெருவரங்கள் - வேறு எவராலும்
நினைத்தற்கும் அரியனவாகிய மேலே சொல்லிய மூன்று பெரிய
வரங்கள். எண் - எண்ணத்தகும் என்று கொண்டு மூன்று
வரங்களுக்கும் மூன்று அடைமொழிகளாகத் தந்தனர் என்றலுமாம்.

     மண்ணின்மேல் வழிபாடு செய்து அருளி- தாம் கேட்ட
முதலாவது வரத்தினை ஏற்றுக்கொண்டு செலுத்தியநிலை கூறப்பட்டது. காமாட்சி அம்மையார் காஞ்சிபுரம் திருக்காமக்கோட்டத்தில்
எழுந்தருளியிருந்து சிவபூசையினை நித்தியமாகச் செய்து
கொண்டிருக்கின்றார் என்பது. அருளி - அப்பூசையின் பயனை
உயிர்களுக்கு அருளி. "என்று மேத்தி வழிபடப் பெற்ற" (தக்கேசி
-கச்சி) என்ற நம்பிகள் தேவாரமும், "பூசனை என்றும் முடிவதில்லை
நம்பால்" (1145).

     மனையறம்...புரக்கும் - இதனால் அம்மையார் தாம் வேண்டிப்
பெற்ற இரண்டாவது வரத்தினைக் கொண்டு செலுத்திய நிலை
கூறப்பட்டது.

     நண்ணும் மன்உயிர் - நண்ணும் - வினைக்கீடாய்ப்
பிறவியில் வருகின்ற. மன் உயிர் - நிலைபெற்ற - அழிவில்லாத -
உயிர். உயிர்க்கு அழிவில்லை என்பதுசாத்திரமுடிபு.

     நீடியவாழ்க்கைப் புண்ணியம் - நிலைத்த இருப்பிடமாகக்
கொண்ட புண்ணியம் பெற்ற. புண்ணியம் - புண்ணியத்தைத்
தருகின்ற- புண்ணிய உருவாகிய - காமக் கோட்டம் என்றலுமாம்.

     திருக்காமக்கோட்டம் - காமாட்சியம்மையார்எழுந்தருளியிருக்கும் பிலத்துவாரமாகிய திருக்கோயில். காமக்கோட்டம் என்ற பெயர் போந்த காரணம் பலவகைகளாலும் காஞ்சிப்புராணத்தினுள் எடுத்துரைக்கப்பட்டது. அதனை