பூமகளுக்கு உறையுள் என- இலக்குமியின் இருப்பிடம் இது
என்றது மிக்க செல்வத்தின் நிறைவு குறித்தது. பின் சொல்லும்உவமப்
பொருள்களின் தகுதி காட்டுதற்கு இவ்வாறு கூறினார். உறையுள் -
தங்கும் இடம்.

     அரமியம் - நிலாமணி முற்றம். "மாளிகையின் மேலால், ஏறி ... மணி நிலா முன்றின் மருங்கு" (316) என்றது பார்க்க.

     மைந்தர் வந்தேறுமுன் துருத்தி வீசும் குங்குமநீர்த்
துவலை தோய்ந்த நாசிகை - என்றது மாதர்கள், மாடங்களின்
மேனிலையில் நிலாமணி முற்றத்தில் எங்கும், துளையுடைய
பொன்துருத்திகளாற் செங்குங்கும நீர்த்துவலைகள் வீசி வைத்தனர்;
அதனை அவர்கள் தமது நாயகர் அங்கு ஏறி வருமுன்னர்ச்
செய்தனர்; அவ்வாறு முன்னர்ச் செய்தது அவர் வரும் போது
வண்டல் ஆடுதற்கு ஆயத்தமாயிருக்கும் பொருட்டாம்;
அப்படி வீசப்பட்டு மாடத்தின் நாசிகையில் தோய்ந்திருந்த
செங்குங்கும நீர்த்துளிகளை அங்குத் தங்கிய கருமுகில்கள்
தோய்ந்ததனால் செந்நிற முகில்களாகிக் காட்டின என்பதாம்.

     பொன்புனை நாளத்துருத்தி - நாளம் - நீண்ட தண்டு.
பொன் - செல்வ நிறைவு குறித்தது. பொன்னாற் செய்யப்பட்ட
உள் துளைகளையுடைய நீர்வீசும் துருத்தி. water spray -
sproutஎன்பர் நவீனர். நீரை அதிகமாக வீழ்த்தாமல் மூக்கின்
சிறு துளைகளால் நீர்தெளிக்கும் ஒருவகை அமைப்புடைய கருவி.
துருத்தி - காற்றின் உதவியால் வீசுவது.

     நாசிகை- மாளிகையின் சிகரத்துக்குக் கீழே, நாசி (மூக்கு)
போல நீண்டிருக்கும் பகுதி. மாடங்களை ஒரு மனித உடலாகக்
கொண்டால் அதன் நாசிபோல்வதனால் நாசிகை எனப்படும்.
மூக்குப்போலக் காற்று உள் வீசுதற்கும் இவை பயன்படும்.

     நாசிகையின் மருங்கு தங்கும் கரு முகில்கள் -மாடங்களின்
உயர்ச்சி குறித்தது. "செல்வ நெடுமாடஞ் சென்று, சேணோங்கிச்,
செல்வ மதிதோய" (கோயில் - குறிஞ்சி) என்ற ஆளுடைய
பிள்ளையார் தேவராங் காண்க. இதனால் மாடங்களின் செல்வ
நிலையும், மகளிர் விளையாட்டும், வாழ்க்கை நலனும் கூறிய
வகையால் நகரச்சிறப்பும், குடிச்சிறப்பும் உடன் கூறப்பட்டன என்க.
95