இங்குக்கூறிய ஓசைகள் பலவும் வெவ்வேறு திறத்தன என்று காட்டத் தனித்தனி ஓசை என்ற ஒருபொருள் குறித்த பல
சொற்களால் கூறிய திறமும் காண்க. தேவர் செய்யும் ஓசைகள்
மண்ணுலக ஓசைகளினும் சிறந்தன என்பதனை அவ்வச்சொற்களாலும்,
அவற்றை மேல் வைத்த முறையானும், அமையும் இம்பர் - உடனே பல்கும் என்ற வினைமுடிபுகளின் ஆற்றலானும் உணர்த்தினார்.

     இங்குக் கூறிய இம்பர் யானை, குதிரை, தேர் என்பன இந்நகர
மைந்தர் மாதர்களுடையன போலும். அரசர்களுடைய
போர்க்கருவிகளல்ல என்றமைத்துக் கொள்ளுதல்வேண்டும்; அவற்றை
1177-ல் வேறு கூறுதலுடன் பொருத்த வேண்டில்.

     விழவறாத அம்பொன் மணிவீதி - காஞ்சி நகரத்தில்,
ஆண்டின் ஒவ்வோர் மாதமும் பல விழாக்கள் நிகழ்வது இன்றும்
காணப்படும் சிறப்பாகும். "கொடிகொள் செல்வ விழாக்குணலையறாக்,
கடிகொள் பூம்பொழிற் கச்சி" (குறுந்தொகை) என்பது தேவாரம்.
"வீதிநாளும் ஒழியா விழாவணி" (1181) "விழவுமலி திருக்காஞ்சி
வரைப்பு" (1179) என்று பின்னரும் இதனைவற்புறுத்துதல்காண்க.
விழாக்கள் வீதிக்கும் சிறப்புத் தருவன. "விழவறாதன விளங்கொளி
மணிநெடுவீதி" (ஏயர்கோன் புரா - 3), "விழவுநின்ற வியன்மறுகு"
(மதுரைக்காஞ்சி - 328).

     அரங்கு - ஆடரங்குகள். இவைகள் பெருநகரங்களில்
அமைவன. "வீதித் தேரோடு மரங்கேறிச் சேயிழையார் நடம்பயிலுந்
திருவையாறே" முதலியவை காண்க.

     தெய்வ உயர் இரவி மா - சூரியனது குதிரை - ஏழு
நிறமுடையதென்றும் அதனால் சப்தாசுவம் என்று பெயர்
பெறுவதென்றும் கூறுதல் மரபு.

     விமானத்துள் ஆடுந் தெய்வப் பாவையர் - தேவ
விமானங்களில் விண்ணினின்றும் இறங்கும்போது தேவ அரம்பையர்
ஆடல் செய்துகொண்டு வருகின்றனர். மண்ணோர் அரங்கிலும்,
அரம்பையர் விமானங்களிலும் ஆடுகின்றனர் என்பதாம்.

     அலையுமிம்பர் - அணையும் இம்பர் - என்பதும்,
அவனூர்தித் தேர் - என்பதும் பாடங்கள். 98