(இ-ள்.) வெளிப்படை. அரசமரபினர் வாழும் பெரிய
வீதிகளிலும், தெற்றியினையுடைய முற்றங்களில்
ஆயுதங்களைப்பயிலும் அகலமான இடங்களிலும், அவ்விடத்துக்
கயிற்றையுடைய யானைகளையும் குதிரைகளையும் ஏறிநடத்தும்
அழகிய வீதிகளிலும், எவ்விடத்தும், பொலிவடையும்படி, வாசனை
வீசுகின்ற நல்ல மலர்களையும் மணிமாலைகளையும் அணிந்த
அரசகுமாரர்கள் செய்யும் அதிசயிக்கத்தகுந்த வில் - வாள் -
முதலிய வித்தைகளைக் கண்டு, வித்தியாதரர்களாகிய
தேவகூட்டத்தார் வரிசையான நெருங்கிய தேவவிமானங்களின்
மேலும் நிலத்தின் மேலும் பலமுறையும் கூடி நீங்காதிருப்பர்.

     (வி-ரை.) தெருவும் - இடமும் - வீதிகளும் - எங்கும் பொலிய
- கண்டு - விஞ்சை விண்ணோர் - நிரந்து நீங்கார் என்க.

     குலப்பெருந்தெரு - குலம்- கூட்டமும் தன்மையும் குறித்த
தெனினுமாம்.

     தெற்றி - சித்திர கூடங்கள். வியல் இடம் - வில் - வேல் -
வாள் - முதலிய ஆயுதங்களை அரசிளங்குமரர் பயிலும் இடமாதலின்
அகலமான முற்றங்களை உடையன என்பது.

     அங்கண் - அதற்குப் பக்கமான இடங்களில். யானை -குதிரை
ஏற்றம் பயிலும் இடங்கள் ஆயுதம் பயில் இடங்களுக்கு அணிமையில்
அமைதல் மரபும் இயல்புமாம்.

     தொடை - பூமாலை. தொடுக்கப்படுவதால் தொடைஎனப்படும்.
அலங்கல் - மணிமாலை.

     தொடை அலங்கற் குமரர் - தத்தமக்குரிய அடையாள
மாலைகளையும், (அவை பெரும்பாலும் மனமும் அழகும்
பெறாவாகலான்) அழகும் மணமுடைய வேறு மலர்மாலைகளையும்
அணிந்த அரசகுமாரர்கள் என்றலுமாம்.

     புரசை - யானைக் கழுத்துக்கயிறு. புரோசை என்ப.
செய்தொழில் கண்டு வியப்புறு விஞ்சை விண்ணோர் - என்று
கூட்டி உரைத்தலுமாம். செய்தொழில் - வில் - வாள் முதலிய
வித்தைகளின் தொழில். வித்தை வல்லவர்களாதலின் இத்தேவர்கள்
விஞ்சையர்கள் எனப்படுவர். விஞ்சை - வித்தை என்பதன்
மரூஉ.