(இ-ள்.) வெளிப்படை. மாதவர் குறித்த காலத்திற்குள்ளே
ஒலித்துக் கொடுத்தற்காகத் தொண்டனார் கந்தையினை
கொண்டுபோந்து, வாசனையுடைய மலர்கள் நிறைந்த நீர்த்தடத்தின்
துறையில் அதனை அழுக்குப் போகத் தோய்த்துப், பின்னர் மிகவும்
புழுங்க வைத்துப், பின்னர் வேறாகத் தோய்க்கப்புகும் பொழுது
பெரும்பகல் எல்லைகழிந்து, பின் பகலாகி, மானேந்து கையினராகிய
சிவபெருமான் திருவருளால் மழை எழுந்து பொழிந்திடுவதாயிற்று.

     (வி-ரை.) குறித்தபொழுதே - "கதிரோன் மேல்கடல்பால்
அக்குன்றம் அணைவதன்முன் தருவீர்" (1196) என்றும் மாதவரும்,
"அந்திபடுவதன் முன்னந் தருகின்றேன்" (1197) என்று தாமும்
குறித்ததாகிய பொழுது - காலம்; சூரியன் படுமுன்.

     பொழுதே - பொழுதினுள் - கால எல்லைக்குள்.வெறித்தடநீர்
- வெறி - நீரினுட் பூக்கும் மலர்களின் வாசனை. நீர்ப்பூக் கொடிகள்
நிறைதலின் அந்நீர் தூய்மையும் துணி தோய்த்து
வெண்மையாக்குதற்குத் தகுதியும் உடையதென்பதும் பெறப்பட்டது.

     துறையின்கண் - நீர்த்தடத்தில் உள்ள பல துறைகளில்
வண்ணார் துணி தோய்த்தற்கென்று ஒதுக்கப்பட்ட துறையில்.இத்துறை
அங்குத் தோய்க்கும் துணிகளின் அழுக்குப்படியும் தன்மையால்
குளித்தல் - குடித்தல் - முதலியவற்றினுக்குத் தகுதியற்றது. அவ்வாறே குளித்தல் - குடித்தலுக்குரிய துறைகளில் துணி
தோய்க்கலாகாதென்பதுமாம். ஆறுகளிலும் குளங்களிலும் வண்ணார்
துறை என்று தனியாக அமைந்துள்ளதனை இந்நாளிலும் பல
இடங்களில் காணலாம். ஆனால் இத்தகைய நல் வழக்கம் சீர்திருத்தம்
என்ற பேரால் இந்நாளில் புறக்கணிக்கப்பட்டு நீர்நிலைகளை மக்கள்
எவ்வித நியதியுமின்றி எல்லாவகையாலும் அசுத்தம் செய்து உலகை
அலைத்து வருதல் வருந்தத்தக்கது.