(இ-ள்.) வெளிப்படை. வகை பண்ணப்பட்ட நால்வகை
உறுப்புக்களினாற் பரந்தெழுந்த சேனையெல்லாம், உலகத்து
அழிவைச் செய்யும் ஊழிக்காற்று மேன்மேல் வந்தெழுந்ததுபோலத்
தோன்ற, (அவ்வாறெழுந்த) சேனை தம்மைப் பின்றொடர்ந்து வரத்,
தாம் ஓர் பெருமை பொருந்திய குதிரையின்மே லேறிக் குளிர்ந்த
கருணை பொருந்திய கொற்றக் குடையுடைய அரசர், அரசமா
வீதியிலே சென்றார்.

     (வி-ரை.) உறுப்பு நான்கு - தேர் - யானை - குதிரை -
காலாள் - என்பன. சதுரங்கசேனை யென்பர். "நெருங்கிய
சாதுரங்கம்" எனத் திருநாவுக்கரசு நாயனார் புராணத்துக் (6) கூறியது
காண்க. இவற்றில் முதல் மூன்று 579-ம் பாட்டிலும், நான்காவது
காலாட்படையைப் படைஞர் என 580 - ம் பாட்டிலும் கூறினார்.

     இறுகால் - இறுதலினை - அழிதலைச் - செய்யும்
ஊழிக்காற்று. சண்டமாருதம் என்பர். கால் - காற்று. கால்
மண்ணிடை வந்தெழுந்தது என்று கூட்டுக.

     போல் தோன்ற - தோற்றத்தால் மட்டும் இவ்வாறு
காட்டியதேயன்றிச் செயலில் ஒன்றும் நிகழ்ச்சியின்றாம் என்பார்
போல் என்றும், தோன்ற என்றும் குறித்தார். ஓசையும் விரைவின்
அசைவும் ஆகிய இரண்டு குணமுடைமையின் சேனைச் செலவிற்குக்
காற்றினை உவமித்தார். "மாருதத் திரண்டை" (திருப்புள்ளிருக்கு
வேளூர்த் திருத்தாண்டகம்), "வளியிடை யிரண்டாய் மகிழ்ந்தாய்
போற்றி" (திருவாசகம்) என்பனவாதி திருவாக்குக்கள் காண்க.
ஐம்பெரும் பூதங்களில் ஊறு - ஓசை எனும் இரண்டு குணமுடையது
காற்று என்பது சாத்திரம்,

     மேன்மேல் - படை வகை ஒவ்வொன்றும் இக்குணச்
செயல்களுடன் வந்து கூடினவாகலின் மேன்மேல் வந்து என்றார்,