என்னமால் கொண்டாய் - என்னவிதமான மயக்கத்தினும்
அகப்பட்டுக்கொண்டாய்? மால்கொள்ளுதல் -
மயக்கத்தினுட்படுதல். "தேவுமால் கொண்டானிந்தத் திண்ணன்" (769)
என்று இதனைத் தெய்வத்தாலாகிய மயக்கம் என்று அவர்கள்
கொண்டது காண்க.

     முதலி - முதல்வன் - தலைவன். எங்கள்
முதல்வனல்லையோ என்றது "முன்னை நாளில் அரசுரிமையேற்றதால்
எங்களைக் காப்பாற்றும் கடமை உன்மேல் உள்ளது. அதன்
பொருட்டே இங்கு வேட்டைக்கு வந்தனை; நீ இவ்வாறு கைவிட்டால்
எங்களைக் காப்பவர்யார்?" என்று அவருக்கு நினைவூட்டினால்
அவர் மயக்கம் தீரும் என்று எண்ணினவனாகி இவ்வாறு அவரிடம்
கூறினான்.

     முகத்தை நோக்கார் - காடன்சொல்லிய சொற்கள்
செவிக்குப் புலப்படாதது போலக் காடனும் அவர் கண்ணுக்குப்
புலப்படவில்லை. ஆதலின் அவன் முகத்தைப் பார்க்கவில்லை.
இந்நிலையின் இயல்பைச் சண்டீசநாயனார் புராணம் 49, 50-ம்
திருப்பாட்டுக்களில் விரிவாய்க் காணலாம். ஆனால், காதல்கொண்ட
அத்தேவரைப்பற்றிய செயல்கள் காட்சிப்படும்; சொற்களும்
செவிப்புலப்படும் என்க. 758-ல் உரைத்தவை காண்க.

     பன்றி - தாம் சுரிகையால் துணித்து அங்குக் கொண்டுவரச்
செய்து நீழலி லிட்ட அப்பன்றி.

     வதக்கி - இது இறைச்சியை உணவாகச் செய்தலின்
முதற்செயல். வதக்குதல் மென்மைபெறத் தீயின்கண் வகவைத்தல்.

     மிக்க இன்புறு தசைகள் - அப்பன்றியின் இறைச்சியில்
மிகச் சுவையும் இன்பமும் தரும் தசைப்பகுதிகள். அம்பினால்
வெவ்வேறு ஈர்த்து - அவ்வினிய பகுதிகள் அதனுடலில் வெவ்வேறு
பாகங்களில் உள்ளனவாதலின் அப்பாகங்களைத் தனித்தனி
அம்பினால் அரிந்து பிரித்து எடுத்து. கொண்டு - வேறாக
எடுத்துக்கொண்டு வேறு பிரித்துக்கொள்ளுதல் இறைச்சியைச் சித்தஞ்
செய்தலில் இரண்டாவது செயல். 117 .