858. (இ-ள்.) நண்ணிய.......பாசத்தாலே - ஒருமை
பொருந்திய அன்பாகிய நாரினால் இயன்ற கயிற்றினாலே;
திண்ணிய...ஒண்ணுமோ - திண்மையுடைய தொண்டர் பூட்டி
இளைப்படைந்த பின்னரும் அக்கருத்துக்கு மாறுபட்டு முன்போலச்
சாய்ந்து நிற்க இறைவர்க்கு முடியுமோ?; கலயனார்தம்....நின்றார் -
கலயனாரது மனத்தில் எழுந்த ஒருமைப்பாட்டினைக் கண்ட
அப்பொழுதே பெருமையுடைய பிரானார் நேரே நின்றனர்;
அமரரும்...ஆர்த்தார் - தேவர்களும் ஆகாயத்தில் மகிழ்ச்சியினால்
ஆரவாரித் தனராகி, 28

     858. (வி-ரை.) ஒருமை நண்ணிய அன்பின் நார் உறு
பாசம் - என்று கூட்டுக. ஒன்றிய சிந்தையினாற் பொருந்திய
அன்பாகிய நார் இழைகளால் முறுக்கப்பட்ட கயிறு. "ஒன்றியிருந்து
நினைமின்கள்" என்ற திருவிருத்தம் காண்க. ஒன்றுதல்
வேறொன்றிலும் செல்லாது அதனிலே பொருந்துதல். "உறவு
கோல்நட் டுணர்வு கயிற்றினால், முறுக வாங்கிக் கடையமுன்
னிற்குமே" என்பது முதலியனவும் இக்கருத்துப்பற்றியன.

     ஒருப்பாடு - ஒருமை நண்ணிய அன்பின் துணிபு. தமது
மற்றைக் கண்ணையும் தோண்ட ஒருப்பட்டுக் கண்ணப்பர் அம்பு
ஊன்றலும் தேவதேவர் தரித்திலராகி அந்தக் கையினைப்
பற்றிக்கொண்டனர் என்ற சரிதம் இங்கு நினைவுகூரத்தக்கது.

     இதற்கு இவ்வாறன்றி, நாயனார் பூட்டி இளைக்கப்
பார்த்திருந்து அதன்பின் சாய்வுமாறி நேர்நிற்றல் தகுமா? ஆதலின்
அவ்வாறு இளைக்கு முன் ஒருப்பாடு கண்டபோதே நேரே நின்றார்,
அண்ணலாராதலின்; என்றுரைப்பதுமொன்று. இப்பொருளில்
இளைத்தபின் திறம்பிநேர்நிற்றல் பெருமைக்குத்தகாதுஎன்றதாம்.

     அண்ணலார் - அன்பினிற் றாழும் பெருமையுடையார்.
அப்பெருமை விளங்கிய இடமாதலின் இங்கு இப்பெயராற் கூறினார்.

     ஆர்த்தார் - ஆர்த்தவர்களாகி. முற்றெச்சம். ஆர்த்தாராகிப்
பாரில் எங்கும் பூமாரி பரப்பினர் என வரும்பாட்டுடன்
கூட்டிமுடிக்க. இதனை வினைமுற்றாகவே கொண்டும், பரப்பினர்
என்றதற்கு எழுவாய் வருவித்தும் உரைப்பாருமுண்டு. 28