தடுக்க சராசரங்களெலாந் தங்க - இசையின் வசப்பட்ட
உணர்ச்சி நிறைவினாலே வேறு வழியிற் செல்லாமற் றடுக்கப்பட்ட
சரம் அசரம் ஆகிய எல்லாவுயிர்களும் அந்நிலையிலே தங்கும்படி.
இதனை 954 முதல் 962 வரை விரித்துக் கூறுவார்.

     தம் கருணை அடுத்த இசை அமுது - தமது கருணை
பொருந்திய இசையாகிய அமுது. திருவைந்தெழுத்துடன் கூடிய
இன்னிசையே இவர்க்குச் சாவா மூவா நிலையை யளித்தலால்
அமுது என்றார். துன்ப உணர்ச்சி நீக்கி இன்ப உணர்ச்சியை
எவ்வுயிர்க்கும் ஆக்குதலால் அமுது என்றார் என்றலுமாம்.
இசையினால் பல நோய்களும் நீங்குகின்றன என்பது மருத்துவநூற்
றுணிபுகளுள் ஒன்று. கருணை அடுத்த - இது எல்லாவுயிர்க்கும்
பயன்றருவதாக என்னும் தண்ணளி. தம் கருணை தங்க - தமது
கருணையில் மூழ்கும்படியாக என்றலுமாம்.

     அளித்துச் செல்கின்றார் - செல்லுதல் - பலநாளும்
கொடுத்து வந்த வழக்கமுடையராகுதல் குறித்தது. செல்கின்றாராகிய
கோவலனார் என்க. வினையாலணையும் பெயர். செல்கின்றார் -
புறம் போந்தார் (943) எனக் கூட்டி முடிக்க.

     அமைத்து - வாசித்து - அளித்து - செல்கின்றாராகிய -
கோவலனார் - நுழுதி - செருகி - புனைந்து - புறங்கட்டி -
ஒளிதயங்க - கவின் விளங்க - அணிந்து - தாழ - அசைய -
விளங்க - சூழ - புறம் போந்தார் என இந்த ஆறு பாட்டுக்களையும்
கூட்டி முடித்துக்கொள்க.

     ஒருநாள் - அஃது ஒப்பற்றநாள். சிவபெருமான் நேரே
எழுந்தருளி இவர்க்குப் பேறு கொடுக்கும் பெருந்திருநாள் என்பது
குறிப்பு. 14