(இ - ள்.) கண் அகன் - இடம் பரந்த, குடுமி மாடம் - சிகரங்
களையுடைய மாடங்களையுடைய, கடிபொழில் - மண மிகுந்த சோலைகளாற்
சூழப்பெற்ற, ஆலவாயின் - திருவாலவாயினது, அண்ணல் அம்பெருமை -
மிகுந்த அழகிய பெருமையை, அளப்பவர் யாரே - அளவிட்டுக் கூற
வல்லவர் யாவர், அவிர்தண் முத்தம் - விளங்கிய குளிர்ந்த முத்துக்கள்
போலும், வெள் நகை உமையாள் - வெள்ளிய பற்களையுடைய
உமையம்மையாரின், அன்புவிளை - அருள் பழுத்த, முகச் செவ்விபோல -
திருமுகத்தின் அழகுபோல, தண் நறும் கமலம் பூத்த - குளிர்ந்த நறிய
தாமரை மலரப்பெற்ற, தடமபெருந் தகைமை சொல்வாம் - தீர்த்தத்தின்
பெருஞ் சிறப்பினைக் கூறுவாம் எ - று.

     அகன், மரூஉ. அண்ணல் என்பதற்கு இங்கே கடவுளெனப் பொருள்
கூறுதல் பொருந்தாமை யறிக. அண்ணற் பெருமை - மிக்க பெருமை.
அம் : சாரியையுமாம். ஏகாரம் : எதிர்மறை. முகச்செவ்வி போலக் கமலம்
பூத்த என்றமையால் இஃது எதிர்நிலையணி. (1)

     (இ - ள்.) ஈது - இப்பொற்றாமரையானது, ஆற்றினுக்கு அரசு ஆம்
- நதிகளுக்கு அரசாகிய, கங்கை காவிரி ஆதி ஆறும் - கங்கை காவிரி
முதலிய நதிகளும், வேற்று உருவு ஆய - வெவ்வேறு வடிவமாகிய, முந்நீர்
வேலையும் - மூன்று நீரையுடைய கடலும், பிறவும் - பிற நீர்நிலைகளும்,
காரும் - மேகமும், தோற்று முன் - தோன்றுவதற்கு முன்னே, தன்னை
ஆட்ட - தன்னைத் திருமஞ்சனஞ் செய்விக்க, செங்கண் ஏற்றினன் -
சிவன்த கண்களையுடைய இடப ஊர்தியை உடையனாகிய, சுந்தர மூர்த்தி -
சோம சுந்தரக் கடவுள், கண்ட தீர்த்தம் ஆகும் - தோற்றுவித்த தீர்த்தம்
ஆகும்; எவ்வாறு என்னில் - எப்படி என்னில் எ - று.

     முந்நீர் - ஆற்று நீர், ஊற்று நீர், மழை நீர் என்பன; படைத்தல்,
காத்தல், அழித்தல் என்னும் மூன்று நீர்மையும் என்ப. முந்நீராகிய வேலை
யெனினும் ஆம். கண்ட - படைத்த. ஈது : சுட்டு நீண்டது. (2)

     (பா - ம்.) * அவிர்ந்த முத்த.