(இ - ள்.) மன்றல் அம் தெரியல் மார்பன் வரகுணன் - மணம்
பொருந்திய அழகிய மாலையையணிந்த மார்பினையுடையனாகிய வரகுண
பாண்டியன், செங்கோல் ஓச்சி - செங்கோல் நடாத்தி, பொன்தலம்
காவலானில் பொலியுநாள் - பொன்னுலகினைப் புரக்குந் தேவேந்திரனைப்
போல விளங்கு நாளில், ஏமநாதன் என்று ஒரு விறல் யாழ்ப்பாணன் -
ஏமநாதன் என்னும் ஒரு வெற்றியையுடைய யாழ்ப்பாணன். வடபுலத்திருந்தும்
போந்து - வடநாட்டினின்றும் வந்து; வென்றி கொள் விருதினோடும் -
வெற்றியினாற் கொள்ளப்பட்ட விருதுகளோடும், விஞ்சை சூழ் மதுரை
சார்ந்தான் - கல்வி மிக்க மதுரையை அடைந்தான்.

     யாழ்ப்பாணன் - யாழாற் பாடும் பாணன். முன் பலரை இசையில்
வென்று விருதுகள் பெற்றவனென்பது. 'வென்றிகொள் விருதினோடும்'
என்பதனாற் பெறப்பட்டது. விருதினோடும் போந்து மதுரை சார்ந்தான் என்க.
(2)

(இ - ள்.) பூழியர் பெருமான் கோயில் புகுந்து - பாண்டியர் தலைவனாகிய
வரகுண தேவன் மாளிகையிற் சென்று, வேத்து அவையத்து எய்தி -
அரசவையை அடைந்து, சூழிமால் யானை யானைத் தொழுது - முக
படாமணிந்த பெரிய யானைகளையுடைய வேந்தனை வணங்கி, பல்புகழ்
கொண்டாடி - பல புகழ்களையும் பாராட்டி, ஏழ் இசை மழலை வீணை -
ஏழு இசைகளையுடைய மழலை போலும் இனிமையைப் பயக்கும் யாழினை,
இடம் தழீஇச் சுருதி கூட்டி - இடப்பக்கங் கொண்டு சுருதி கூட்டி, இன்
இசைத்தேன் - இனிய இசையாகிய தேனை, மன்னன் அஞ்செவி வழியப்
பெய்தான் - அரசனது அகஞ் செவி நிரம்பி வழியுமாறு சொரிந்தான். தழீஇ,
சொல்லிசை யளபெடை. சுருதி கூட்டி - பண்ணமைத்து. வாழி, மங்கலப்
பொருட்டாய அசைச்சொல். அஞ்செவி - அகஞ்செவி. (3)