பொன்மலர் என்றமையின் கைதை செந்தாழையாகும். பொன் -
அழகுமாம். கொடுமை - வளைவு. மனக்கு, அத்துச்சாரியை தொக்கது.
நகைமதிக் கொம்பு. இல் பொருளுவமை. (2)

     (இ - ள்.) அத்தன வணிகற்கு உரிய நல் மருகன் - அந்தத்
தனவணிகனுக்கு உரிமையுடைய நல்ல மருகனொருவன், முத்தமிழ்
மதுரைப்பதி உளான் - மூன்று தமிழையுடைய மதுரை நகரி லிருந்தனன்;
அவன் முதல் கடிமணம் முடித்தோன் - அவன் முன்பே மணம்புரிந்து
கொண்டவன் (ஆயினும்), அவற்கே - அவனுக்கே, நான் நோற்று பயந்த -
நான் தவங்கிடந்து பெற்றெடுத்த, வித்தக மயிலை முறையினால் கொடுப்பல்
என்று - சதுரப்பாடுடைய மயில்போன்ற புதல்வியை முறைப்படி மணஞ்
செய்து கொடுப்பேனென்று, அனைய வியன்குல வணிகர்கோன் - அந்தச்
சிறந்த குல வணிகர் தலைவன், தன்னோடு ஒத்த பல் கிளைஞர் யாவரும்
அறிய உணர்த்தினான் - தன்னுடன் ஒத்த பல கிளைஞ ரனைவரும் அறியத்
தெரிவித்தான். சில பகல் கழிய - சின்னாட்கள் நீங்க.

     மருகன் - தங்கை மகன். வியன் குலம் என்பது வலித்தலாயிற்று.
கிளைஞர் - ஞாதியரும் சுற்றத்தாரும். (3)

     (இ - ள்.) ஊழ்வினை வலியால் ஆருயிர் இழந்தான் - பழவினையின்
வலியினாலே தனது அரிய உயிரைத் துறன்தனன்; உயிர்க்கு உடம்பு அனைய
- உயிருக்கு உடல்போன்ற, தன் கற்பின் சூழ்கதிர் மணிப்பூண் மனைவியும் -
அவனது கற்பினையுடைய ஒளிமிக்க மணிகளழுத்திய அணிகளையணிந்த
மனைவியும், இறப்பத் துணிந்தனள் - இறக்கத் துணிந்து விட்டனள்; அவர்
இருவோர்க்கும் - அவரிருவருக்கும், ஆழ் கடல் கிளைஞர் செயத்தகு
கடன்கள் ஆற்றி - ஆழ்ந்த கடல்போன்ற சுற்றத்தார் செய்யத்தகுந்த கடன்களைச் செய்து முடித்து, அச்செய்தியை மதுரைவாழ்தரு மருகற்கு உணர்த்துவான் - அந்தச் செய்தியை மதுரையில் வாழும் அவன் மருகனுக்கு அறிவிக்கும் பொருட்டு, ஓலை விடுத்தனர் - ஓலை எழுதிப் போக்கினர்; மருமகன் வாங்கா - மருமகன் அந்த ஓலையை வாங்கி.

     தன் கருத்து முற்றுப் பெறுமுன் உயிர்துறந்தா னாகலின் 'ஊழ்வினை வலியால்' என்றார். அனைய மனைவியும் கற்பின் மனைவியும் எனக் கூட்டுக. துணிந்து இறந்தனள் என்க. கடன்கள் - அபரக்கிரியைகள். உணர்த்துவான், வினையெச்சம். (4)