(இ - ள்.) அங்கு உள கிளைஞர் சிலரொடுங் கூடி - அங்குள்ள சில
சுற்றத்தாருடன் சேர்ந்து, அருங்கடி மதுரை நீத்து - அரிய காவலையுடைய
மதுரையை விட்டு, ஏகி - சென்று, பொங்கு இருங்கழி சூழ் பட்டினம் குறுகி
- பொங்குகின்ற பெரிய உப்பங்கழி சூழ்ந்தபட்டினத்தை நெருங்கி, புகுதுவான்
வரவு அறிந்து - அதில் புகுகின்ற வனது வரவினை யறிந்து, அங்குத் தங்கு
தம்கிளைஞர் வினவ நேர்வாரை - அங்கு வசிக்கும் சுற்றத்தவராய்
அச்செய்தியைக் கேட்க வருகின்றவரை, கொங்கு இவர் தனவத்தாரினான் -
மகரந்தம் பரந்த முல்லை மாலையை யணிந்த அவ்வணிகன், தழீஇத் தழீஇத்
செலவிடுத்து ஏகி - தழுவித்தழுவிச் செல்ல விடுத்துச் சென்று, மாமன்
கோயல்புக்கு இருந்தனனாக - மாமன் மாளிகையிற் புகுந்து இருந்தானாக.

     புகுவானாயினன் அங்ஙனம் புகுகின்றவனது வரவினையறிந்த வினவ
நேரும் கிளைஞரை என உரைக்க. துயரம் வினவுவாரும் வினவப்படுவாரும்
தழுவிக்கொள்ளுதல் ஒருசாராரிடைக்காணப்படும் வழக்கம். (7)

     (இ - ள்.) சிலநாள் கழிந்த பின்னர் - சிலநாட்கள் சென்றபின், நாய்கர்
ஏறு அனையான் - வணிகருள் ஏறுபோல்வானாகிய அவன், அன்ன
வாள்புரை கண்ணினாளை - அந்த வாள்போலுங் கண்களையுடைய
மங்கையை, மதுரையில் கொடுபோய் - மதுரைக்கு அழைத்துக் கொண்டு
போய், அங்கு என் கேளிர் முன் வேட்பல் என்று கிளந்து - அங்கு எனது
கிளைஞர் முன்னிலையில் மணஞ் செய்வேனென்று கூறி, தன் மாமன் ஈட்டும்
நீள் பெரும் பொருள்கள் மற்றும் - தனது மாமன் தேடிய மிகப் பெரிய
பொருள்களையும் பிறவற்றையும், கைக்கொண்டு நெறியில் செல்வான் -
கைப்பற்றிக் கொண்டு வழியிற் செல்வானாயினன்.

     முன் மணமுடித்தோனாகலின் மதுரையிலுள்ள கிளைஞர் ஐயுறா
வண்ணம் அவர் முன் இவளை வேட்டல்கருதினான். மற்றும் என்றது ஆடை
அணி முதலியவற்றை. (8)

     (இ - ள்.) வழிவிட வருவார் தம்மை நிறுத்தி - வழிவிட வருகின்ற
வரை நிற்கச் செய்து, பின் மதுரை மூதூர்க்கு எழுதரு சுற்றத்தாரை - பின்
பழைய மதுரைப் பதிக்குப் புறப்படும் கிளைஞர்களை, முன்சென்மின் என்று
போக்கி - முன்னே செல்லுங்களென்று அனுப்பி, தொழு பரிசனமும் தானும்
தோகையும் - தன்னை வணங்கும் ஏவலாளரும் தானும் மங்கையுமாக, வைகல்
ஒன்றில் கழிவழி - நாள் ஒன்றில் நீங்கும் வழி, அரைமேல் பெய்த
காவதமாகப் போவான் - ஒன்றைக் காவதமாகப் போவானாயினன்.